ORANJESTAD (AAN)—Mediador Anselmo Pontilius, durante un entrevista cu DIARIO, a elabora tambe encuanto e scarcedad di trahado cu tin na Aruba, pa labora den diferente sector.
El a bisa cu e director di AHATA mes ta duna indicacion cu den e sector di Horeca nan ta buscando trahador pero nan no ta haya. E tin pregunta con ta bay atende cu esaki? Enberdad nos tin falta di hopi hende den diferente sector? Tin e discusion si personanan pensionado cu ta sinti cu habilidad pa traha lo wordo tuma den servicio, si of no?
“Tin e discusion eterno cu e persona pensionado cu ta fit ainda pa traha cu kier traha cuater of cinco ora pa dia ta bisa cu ta bin e parti di belasting extra riba su entrada, y mester atende cu e discusion aki.
E parti di e mercado laboral aki ta un punto cu ta serio y den un acuerdo nacional mester atende cu ne. Tin trabaonan permanente ora cu hotelnan habri y, logico, den construccion tin otro area, den cual nos ta bay scucha sector di construccion con nan ta wak 2024 cu cantidad di proyecto”, Pontilius a comenta.
El a bisa cu e proyecto di aeropuerto ta hop avanza caba, mescos cu esun di hospital, y el a mira e dos hotelnan nan Palm Beach, un di nan ta Iberostar, ta hopi avanza, esun di San Nicolas ta menos avanza pero e ta bay sigui. E pregunta e ora ey ta cu e prome seis lunanan sigur lo tin hopi trabao.
Pero den e mundo di construccion mester wak con nan ta mira e proyeccion. Tin menos, of mas trabao, den e sector ey den e 12 luna siguiente? Pontilius a bisa cu e proyectonan di renovacion di algun di scol cu minister di enseñanza a anuncia, kizas por yuda e sector di construccion keda dinamico. Tin hopi edificio na Aruba cu mester di renovacion y e pregunta ta con ta bay atende cu esaki, segun e fondonan disponibel.
