Segun Misha Raymond:
ORANJESTAD (AAN): Mayornan mester ricibi mas informacion y guia tocante e riesgonan cu uzo di pantaya y exposicion na cierto contenido por trece pa e desaroyo di nan yiunan. Asina GZ Psicologo di Mucha y Hoben na Respaldo, Misha Raymond, a expresa durante un entrevista cu DIARIO. Sea cu ta trata di un tablet, celular of otro aparato electronico, tanto e tempo di uzo como e contenido ta merece atencion.
Raymond a señala cu, ora mayornan tin mas conocemento di e posibel efectonan riba comportacion y desaroyo di nan yiu, nan ta den un miho posicion pa tuma decisionnan consciente y establece limitacionnan apropia.
Sinembargo, falta di tempo y guia por haci cu mayornan no sa con pa atende cu e situacion. Segun Raymond, esaki ta motibo di preocupacion, pasobra patronchinan di comportacion cu no wordo atendi na tempo por bira mas dificil pa cambia den futuro. E patronchinan aki por influi riba e manera cu muchanan y hobennan ta enfrenta stress y frustracion, y con nan ta relaciona cu otronan.
E psicologo a enfatisa cu mayornan no mester carga cu e responsabilidad aki nan so. Ademas di e sosten di instancianan manera FADA, ta necesario pa Gobierno tambe desaroya un maneho y inicia accionnan pa atende cu e tema na nivel nacional.
“Esaki no ta un problema di un cas, di un famia. E ta un problema di nos sociedad. Y si nos no atende cu e problema aki, aki paar di aña, nos lo bay tin problemanan hopi mas grandi di loke nos ta wak awo”, Raymond a enfatisa.
El a remarca cu e preocupacion no ta limita na medianan social. E ta trata tambe di e edad na cual muchanan ta wordo exponi na contenido inapropia y e facilidad cu nan por haya acceso na dje. E rapides di e desaroyonan digital ta haci cu mayornan y instancianan constantemente mester adapta. Segun Raymond, esaki por causa cu riesgonan ta wordo identifica apenas ora e problema ya a crece.
Pa mayornan cu ta cria nan yiunan nan so, of cu mester combina mas di un trabao, e reto por ta ainda mas grandi. Falta di tempo y sosten por laga nan sinti cu nan mester resolve tur cos nan so. Raymond a recalca cu nan no mester enfrenta e situacion sin ayudo.
P’esey, sosten di tur ta esencial. Mayornan mester por conta cu informacion accesibel, guia practico y sosten di e instancianan concerni, mientras Gobierno mester establece un maneho cla pa sostene e esfuersonan aki. Protege e desaroyo di muchanan den un mundo digital ta exigi compromiso di henter sociedad, cu accion na tempo y sosten concreto pa famianan.
