Michelmira Arends di Plan di Mayor:
ORANJESTAD (AAN): Den cuadro di e di 30 aniversario di Wardacosta di Caribe Hulandes, 30 mucha di Plan di Mayor lo haya e oportunidad pa participa den un actividad special organiza en conhunto cu Wardacosta.
Ademas, cu motivo di Dia Internacional di Mucha, cu ta wordo celebra riba 20 di november, Plan di Mayor lo organiza diferente actividad bou di su programa KIES, destina pa muchanan cu mayornan separa of divorcia. Durante e siman di 16 te cu 20 di november, e enfoke lo ta riba e derechonan di muchanan cu nan mayornan no ta hunto.
E programa lo sigui riba 21 di november na Mariniers Kazerne, caminda Wardacosta tin diferente actividad prepara pa muchanan di 7 te cu 17 aña. Hobennan di mas edad cu tin interes pa participa tambe ta bon bini.
Michelmira Arends, coordinador di KIES, a splica cu yiunan di mayornan cu ta cliente di Plan di Mayor lo haya prioridad pa participa. Sinembargo, e invitacion ta habri tambe pa muchanan di Aruba cu mayornan separa of divorcia, aunke nan no ta cliente di e oganisacion.
Durante e siman, diferente organizacion y profesional lo duna charlanan na e muchanan. Entre e participantenan tin Fundacion Respetami, Fundacion Pa Nos Muchanan, Janine Rodriguez di KPA, Parlamento Hubenil y un abogado cu lo splica e derechonan di mucha.
Mayornan cu desea inscribi nan yiunan por tuma contacto cu Plan di Mayor via WhatsApp na 569-6871. Participacion ta gratis y na final e muchanan lo ricibi un goodie bag pa hiba cas.
Arends a expresa su gratitud na Wardacosta pa e bunita iniciativa y pa brinda e muchanan e oportunidad pa participa den e actividad special aki.
