Minister Rocco Tjon ta indica:
ORANJESTAD (AAN)—Minister Rocco Tjon, titular di Husticia y Asunto Social, a sigui splica den conferencia di prensa, relaciona cu e trabao cu su ministerio ta realizando pa combati abuso di mucha, cu procesonan di trabao a wordo adapta y diferente metodo nobo a wordo introduci, manera e Codigo di Proteccion, Science of Safety, pero tambe a inverti hopi a base di proyectonan, tambe den e personal mes cu ta traha den e veld.
“Por ehemplo, nos a introduci un medico forensic, diferente metodo nobo manera Terapia Multidimensional di Famia, y tur esaki ta pasonan pa eleva seguridad pa nos muchanan. Nos sa di e proyecto ‘Family Justice Center’ pero tambe tin un proyecto cu yama ‘Intensive Samenwerking en Veiligheid’. Kiermen, tin asina hopi proyecto cu a wordo introduci, hustamente pa eleva e seguridad di nos muchanan”, Miniter Rocco Tjon a remarca.
Minister Tjon a agrega cu na fin di April tabata tin un Foro Nacional, cu panelistanan cu a splica exactamente kico tur a wordo haci e ultimo temponan, y e tabata recien den Parlamento den e Comision di Husticia y Asuntonan Social, unda nan a elabora, hunto cu tur e profesionalnan, kico ta tur e pasonan cu a wordo tuma. “Y mi ta kere, un paso hopi significante cu ta toca specificamente e incidente cu nos a wak ayera, ta hustamente pa percura pa e ley cu ta regula e parti di kinderopvang, e aspecto di crèche, a wordo trata den Parlamento y a wordo aproba y banda di esey a introduci tambe e Departamento di Mucha y Hoben. Mi kier ta critico si, pasobra hopi di esnan cu ta puntra pa nos actua aworaki, djis tabata contra introduccion di e ley aki tambe”, Minister Rocco Tjon a señala.
E dignatario a subraya cu hustamente awor ta wak e necesidad, e importancia di e ley aki, cu ta pa eleva seguridad pa nos muchanan. “Y nos kier logra esaki, a base di diferente angulo. E ley aki ta toca tur e diferente criterionan cu un crèche mester tene nan mes na dje: e parti infrastructural, higiene, e plan con bo ta bay guia y educa e muchanan, e parti Pedagogico, pero e parti tambe di cuanto leidster mester tin den un crèche cu tanto mucha cu nan ta acomoda. Pues tin diferente faceta. Mi kier asegura cu e Departamento di Mucha y Hoben, por guia mayornan tambe con nan por scoge un crèche, nan tin e registro, nan sa kico ta e puntonan cu un mayor mester tene cuenta cu ne na momento cu e ta bay laga su yiu acudi na un crèche”, Minister Tjon a indica.
El a agrega cu e departamento aki tin e rol di brinda e informacion aki y guia e mayornan. “Kiermen, di e banda aki tambe e mensahe ta bay pa tur esnan cu tin un mucha na un crèche. Si bo mester informacion, si bo mester di guia pa un escogencia, bo por acudi na Departamento di Mucha y Hoben, pa cu esaki”, Minister Rocco Tjon, titular di Husticia y Asunto Social a reitera.
