ORANJESTAD (AAN): Un sorpresa sin duda alguno! Durante un entrevista cu Ruben Garcia tabata haciendo cu Maybelline Arends-Croes,
e directiva di Go Cultura Foundation a anuncia como sorpresa na Maybelline, cu el a bira e ganadora di e premio di Aruba su Crioyo di Oro pa 2022!
Esaki lo bira un grandioso homenahe musical di gala cu lo tuma lugar 30 di november den Cas di Cultura.
E anochi aki Maybelline como invitado di honor y tur esnan presente lo disfruta di algun ora largo di un show di kita sombre. E anochi aki tambe e lo ricibi e premio nacional den su man.
Hopi pabien na Maybelline Arends-Croes. Directiva di GoCultura Foundation ta gradici Ruben pa a permiti nan sorprende Maybelline. E aña aki, Go Cultura a permiti publico general tambe pa nomina nan faborito, y pesey ta manda bisa danki na tur esnan cu a manda nan nominacion. Den e mas cu mil nominacionnan, Maybelline su nomber tabata aparece cu un cantidad abrumador di nominacion.
No tin duda den Aruba su deseo... no tin duda cu e baluarte aki ta e proximo cu merece su homenahe y e “lifetime achievement award” aki pa excelencia artistico y pa su aporte na desaroyo cultural di Aruba.
Potret pa cortesia di Genevieve Garcia.
