IN MEMORIAM
“Tila” nos Guido Stima
Ora den Savaneta y becindario hende menciona e nomber “Tila”, e ta wordo considera sinonimo di “Jeanne d’Arc Padvinderij”, e grupo cu Guido (Gido) Tila Schwengle, a lanta na aña ‘56, tempo e tabatin apenas 24 aña. Ami y diferente otro muchamuhe di Savaneta y Pos Chikito tabata den e prome grupo di padvindster. Padvinderij mundialmente tabata pa muchamuhe so y esey semper a keda asina.
Guido a start cu e asina yama “Mensenkindkring” hunto cu Oehoe Sra. Anna Jansen y lidernan Marvel Muller, Margo de Kort, Chichita Wever, Vera Oduber y Jo Arends. Pa dos aña, nos a reuni bou un palo di kwihi; na 1958 LAGO OIL & Transport Company a regala nos grupo un barak, cu a keda converti den nos prome Clubhuis.
Durante nos periodo como padvindster bou e man firme pero yena di amor di nos Guido, nos a siña hopi cos: mara tur sorto di conopi, traha kampvuur di forma profesional, siña cantica den diferente idioma y corda cu no tabatin You Tube, di baina Radio Caracas Television, baile y naturalmente siña hisa, baha y dobla bandera y marcha.
Lo mas importante cu nos a siña tabata pa na prome luga, semper tin respet pa tur cos cu ta bibo, siña survive, di no tin miedo di nada y di siña biba cu lo minimo di mundo. Nos uniform semper mester ta limpi, bunita strica cu tur insigna riba dje.
Dia di nos fundador mundial Lord Robert Baden-Powell, riba 22 di februari, Guido tabata percura pa su grupo Jeanne d’Arc por participa den e marcha grandi sea na San Nicolas of na Playa. Op en Top den uniform guma, fluitkoord blanco manera sneeuw, sapato geshine nos tabata marcha riba musica, hunto cu e gruponan di full Aruba. Un par di bes pa aña nos tabata bay campa cu Guido y su leidsternan.
Esaki tabata momentonan di mas dushi di padvinderij. Nos tabata campa e.o. na Plantage Tromp; anochi cende kampvuur, hunga comedia, canta y conta storia. For di e tempo ey caba, como mucha di 12 aña mi tabata skirbi storia pa comedia. Rond di e candela nos tabata balia y canta e cantica na Ingles “The Zulu Warrior”. Como cu mi ta cord’e te ainda, ayera mi a busk’e riba YouTube y... di berdad e ta sisti. Riba e mesun wijs cu nos a siñ’e di Guido. Nos tabata bali’e rond di candela y buig pa e cadela. E ta un ritual africano, mi ta compronde awor.
Tambe e folksong Italiano “Cuàndo se pianta la bèla polenta” mi ta canta te ainda. E canticanan di kampvuur nos tur tabata sa fey cabes y naturalmente e diez puntonan di nos ley di padvindster cu ta data fey aña 1936: 1. Een Padvindster is eerlijk; 2. Een Padvindster is trouw... Guido tabata pone nos para stret y nos tin cu bis’e duro sin faya. Un bes pa aña nos tabata sali pa haci “Heitje voor een Karweitje”. Heitje ta un palabra bieu hulandes pa 25 cen.
Esey kier men cu nos tabata haci un trabou (karweitje) pa 10 placa. Mayoria bes nos tabata haya un florin, of tin ora mas pa laba algun coi kibra of bari. E hendenan di bario tabatin masha pret cu nos den nos uniform ta haci trabou pa nan. E placa tabata bay pa bon causa. Un bes den tanto tempo, esnan cu a demostra di por wanta un reto pisa, Guido tabata hiba nos den hibaro di mondi, tiki cuminda, poco awa, djis cu nos paña na curpa, cana den mondi, cumpli cu diferente tarea y sobrebibi. Nos tabata come loke nos por a wanta stoma cu ne, landa na lama, y pone piedra bou lenga ora awa caba.
Cu compas nos mester a haya nos caminda bek pa cas. Hopi tabata cay afo na caminda, ami ta entre e tresnan cu a wanta. Cansa, soda, lenga manera cuero di sapato di sed, tur na tera nos a cana drenta mundo civilisa bek. Bandi nos, nos Guido, mes cansa pero cu un smile riba su cara di orguyo. Confiansa den nos mes y nos autoestima a bay te shelo. Awendia bo por gana placa cu e tipo di challenge aki. Guido tabata un visionero y adelanta pa su tempo. Cu hopi pasenshi, sin nunca halza su bos, el a forma y yuda nos bira muhenan balente, cu no ta ria ni rindi, cu ta para pa loke ta bon y husto. Ami a siña hopi di Guido.
Despues cu mi a bay studia na Hulanda, Guido a sigui te na edad halto, ainda dunando su tempo, su rosea y su bida pa hobennan den padvinderij. Na 1993 Padvinderij pa muchamuhe na Aruba a bira un ‘associate member’ di World Association of Girl Guides and Girl Scouts. Den e periodo aki mi a presenta nos Guido pa un condecoracion real na Kanselarij y Guido a bira Lid in de Orde y despues presenta pa otro persona, el a keda condecora como Ridder in de Orde van Oranje-Nassau. Na 2008 Guido a lanta e grupo “ODIG_A, Aruba” pa tur ex-padvindster adulto (A den e nomber di ODIG_A, Aruba) di grupo Jeanne d’Arc y di Aruba henter.
Mi storia den forma di un In Memoriam ta un acto di gratitud na un persona cu curason di oro y cu a hunga un papel importante den mi hubentud y desaroyo como adolescente. Bo ta reconoce un padvindster ora e ta duna bo man cu su man robes, e man mas cerca di nos curason y cu ta un gesto di amistad. Padvinderij y Scouting sigur tin nan lugar den comunidad; awor mas cu nunca nos mester di lidernan fuerte pa duna guia na nos hobennan.
Manera un lider grandi den Padvinderij a bisa mi: “Antes no tabatin sicologo y ta Padvinderij tabat’ey pa yuda mucha timido of miedoso surpasa nan angustia.” Y esey ta berdad paso como padvindster bo ta biba segun e 10 puntonan den e Ley di Padvindsters y punto 4 ta bisa: “Un padvindster ta amabel pa tur hende y un ruman pa tur otro padvindster.”
Como padvindster nunca bo ta laga un otro padvindster cay. Bo legato ta sigui, nos Guido stima y lo traspasa tempo. Bo a cumpli debidamente den e bida aki. Awe na bo despedida, mi a ripara e tristesa enorme cu a reina ora cada un di nos a realisa cu un epoca importante a cera pa semper. Pero bo nomber lo keda rezona den nos storianan pa nos nieto y bisanietonan pasobra abo Guido, hamas nos lo por lubida. Bo ta un icono Arubiano y manera bo no tin dos. Awor drumi dushi y te despues. Rust zacht lieve Guido en Goed Pad.
Yolanda Croes, oud-padvindster Grupo Jeanne d’Arc y miembro di ODIG_A, Aruba
Na nomber di tur oud-padvindster di Grupo Jeanne d’Arc
Grupo Jeanne d’Arc existente bou guia di Annelien Tromp-Diaz
ODIG_A, Aruba bou Presidencia di Dorothy Hunt
Aruba, 10 di october 2022
