Durante Open Dag:
*Hopi pregunta a wordo haci y hopi informacion duna
ORANJESTAD (AAN) —Gilmar Croes a splica cu na final di e tour parti paden, na WEB Aruba NV, Diadomingo durante e open dag, e publico a haya oportunidad di drenta un planta cu un motor cu no ta den servicio, cu por duna idea con e produccion di awa y coriente ta tuma lugar.
Por bisa cu masalmente, pueblo a bishita e compania, a haci pregunta y a haya informacion al caso.
“Nan ta wak con e proceso ta, nan a mira e motor fisicamente, tabata tin demostracion di piezanan cu ta forma parti di esaki, a haya full un splicacion di e tecniconan y haci pregunta”, Croes a indica.
Manera ta conoci, nos a haya ultimamente hopi comentario tocante black out, blokeo di coriente, y e bishitantenan por a haci pregunta y haya informacion corecto, kico tur ta sosode riba e aspecto aki.
Esaki tabata e momento oportuno di haya informacion pasobra ta conoci cu tin hopi pregunta eyfo, pero no tabata solamente tocante produccion di awa y coriente, sino tambe e parti di laboratorio y di servicio na cliente, con despues di e produccion di awa e ta yega te e cranchi di cas. Y tambe con despues di produci coriente e ta wordo manda na e rednan di ELMAR pa e compania na su turno distribui esaki pa pueblo. Tur departamento tabata presente, incluyendo esun di e meternan, tambe di e materialnan cu ta wordo uza tanto awa como coriente, y asina mucho mas.
