Ramon Negron di Consulado Mericano:
ORANJESTAD (AAN): Recientemente a haci apertura oficial di Ban Studia y Education USA, unda cu futuro studiantenan di estudionan avansa por busca tur tipo di informacion y ricibi ayudo.
Durante un conferencia di prensa y ceremonia representante di Consulado Mericano Ramon Negron a hiba palabra.
El a splica cu alrededor di 30 aña pasa tabata hopi dificil pa aplica pa bay studia na Merca.
“Ami ta di Puerto Rico cu ta parti di Merca, pero te hasta 5 aña pasa tabata hopi dificil pa manda mi dos yiunan muher pa College, pasobra e proceso ta hopi complica”.
Mester busca pa haya sa con pa financia e estudio, wak e posibilidadnan pa haya un beca y evalua cu ta e mihor direccion pa bay, segun Negron.
El a sigui bisa cu pesey un programa manera di Educacion USA ta importante pa dunabo un sentido di locual bo ta bay drenta aden y con pa busca e mihor opcion pa bo mes.
“Nos ta spera cu e programa aki den e partnership entre otro cu minister Gerlien Croes lo fungi manera nos ta pensa e lo fungi, pa asina un estudio na Merca bira un di e cantidad di posibilidadnan cu tin pa sigui un estudio avansa”, segun Negron.
El a indica cu ta importante pa e futuro studiantenan tin e informacion completo riba tur e posibilidadnan di bay studia, incluyendo un estudio na Merca.
“Mas opcion e studiantenan tin, mas mihor”, segun Negron.
{gallery}Mas opcion un futuro studiante tin, mas mihor{/gallery}
