ORANJESTAD (AAN): Despues di 2 siman di estudio, expertonan internacional, local y boluntarionan ta descubri mas cu 20 especie nobo di mata pa Aruba. Riba e potret por mira di robez pa drechi: “Melochia parvifolia” y e “Cienfuegosia cf. affini”.
Fundacion Parke Nacional Aruba (FPNA), un fundacion independiente encarga cu e conservacion y maneho di areanan terestial y marino proteha na Aruba hunto cu Wageningen University & Research (WUR) y Carmabi ta anuncia cu mas cu 20 diferente sorto di especie di mata nobo a ser descubri pa Aruba. Den un periodo di 2 siman, Dr. Andre van Proosdij y Dr. John Janssen di
Wageningen University & Research hunto cu Erik Houtepen, Head of Consultancy Department di Carmabi, Giancarlo Nunes, Research and Conservation Manager di FPNA, partnernan local y boluntarionan a bay bishita diferente areanan na Aruba manera Saliña Malmok, Saliña Cerca, Ser’i Teishi y Sero Colorado pa asina studia mas di Aruba su vegetacion.
E ultimo estudio di vegetacion cu a worde haci na Aruba tabata den añanan 1990 y a worde haci door di John de Freitas di Carmabi. E raport aki no a worde publica, sinembargo, aña pasa, Dutch Caribbean Nature Alliance (DCNA) y Wageningen University & Research (WUR) a aloca fondonan pa asina completa y publica e raport di vegetacion di Aruba. Como parti di e estudio di vegetacion, e team di experto international cu ta na Aruba tambe a haci un reencuesta den e areanan unda a haci e estudio di vegetacion den añanan 1990, tambe a mapa areanan protehi cu no tabata parti di e estudio di vegetacion haci anteriormente, a registra especie di matanan encontra na Aruba den e databse di distribucion di mata cu a worde lansa e siman cu a pasa.
Y por ultimo, e team a bin pa crea capacidat di nos partnernan local y boluntarionan di organizacionnan manera Directie Natuur en Milieu (DNM), StimAruba, Ban Lanta y Planta y Santa Rosa pa asina ekipa otro organizacionnan cu conocemento y habilidad pa asina por tin mas hende cu tin e capacidad pa haci estudio di flora y vegetacion pa Aruba.
E estudio di vegetacion cu a tuma lugar e ultimo dos simannan aki lo provee datonan cu lo worde usa pa un analisis preliminario pa wak con e vegetacion di Aruba a cambia e ultimo 25 añanan. Loke si por worde confirma ta cu mas di 20 diferente especie nobo di mata a worde descubri pa Aruba, y algun di e especie di matanan aki ta nobo pa islanan ABC y hasta algun cu ta nobo pa Caribe Hulandes. Casi mita di e especienan nobo di matanan descubri ta nativo pa e region di Caribe y por worde considera como natural pa e flora di Aruba. Algun ehempel ta e Melochia parvifolia y e Cienfuegosia cf. affinis cual a worde descubri door di expertonan local.
E otro mita di matanan cu a worde descubri ta bin di otro partinan di mundo y cu a worde introduci na Aruba intencionalmente of accidentalmente. Algun di e matanan aki ta invasivo y ta presenta un menaza pa Aruba su ecosistema natural. Algun ehempel di esakinan ta Cylindropuntia tunicata y Scaevola taccada. E data cu a worde colecta di especie di mata y vegetacion lo contribui na mihor conocemento, comprendemento y conservacion di Aruba si patrimonio natural.
Por ultimo, desde aña 2018, Wageningen University & Research y Carmabi ta trahando hunto pa colecciona dato historico y dato mas recien tocante composicion di vegetacion y distribucion di cierto especie di mata na e seis islanan di Caribe Hulandes. Observacionnan di mata di e database CACTUS aki awor ta disponibel online atraves di e website di DCBD (http://speciesdistribution.dcbd.nl). E website aki a worde lansa na Aruba e siman cu a pasa aki.
E database CACTUS ta consisti di alrededor 2,500 releves di vegetacion digitalisa, resultando den casi 40,000 observacion di especie di mata. Esakinan ta keda complementa pa casi 10,000 registracion di mata cu potret digital, database di cuidadanonan cientifico, herbaria, reportahe di inventario y registracion adicional di veld.
Pa mas di 80% di e total di e especienan di mata vascular nativo y no nativo presente na e seis islanan, awor ta dispone di algun observacion, cu ta cubri principalmente e periodo di 1950 pa 2022. Actualmente ta ehecutando un proyecto NLBIF cu e meta pa digitalisa registro di herbario historico adicional pa tur e seis islanan. E datonan ta presenta riba un resolucion cuadra di 1x1 km den e website. E datonan geograficamente mas detaya ta disponibel ariba peticion, cu tin un meta cientifico of di conservacion. E website ta permiti seleccion di observacion dentro di temporada di aña, unda ta permiti analisis di tendencia di distribuicion di cierto especie, specialmente den areanan cu a worde bon estudia.
E analisis di tendencia ta un herment esencial pa construi listanan cora di especie den peliger di extincion. Ademas ta posibel pa mira gap di data pa especienan specifico, loke por anima e jaagdonan di mata entusiasma pa provee registro di observacion nobo di e matanan aki. E cantidad di observacion pa isla ta diferencia hopi, cu mayoria di e registronan (56 %) di Curaçao, sigui pa Aruba (13%) y Bonaire (11%). Pa St/ Maarten, e datonan ainda ta relativamente scars.
Ta agrega registro nobo ariba base regular, despues di cua ta actualisa e data presenta den e website di DCBD. Fundacion Parke Nacional Aruba ta maneha aproximandamente 24% di Aruba su tereno natural cual ta designa como area natural protehi y como un organizacion di maneho di conservacion nos ta comprometi na preserva, proteha y mantene un sistema ecologico cu ta diverso, saludabel y resiliente pa Aruba.
