ORANJESTAD (AAN): Diferente pais ta dunando un man pa stop narcotraficantenan di cruza Lama Caribe carga cu droga den speedboatnan tipo GoFast.
Den fin di siman a ta danki na cooperacion entre Armada Colombiano y Fuerza Aereo Colombiano, a logra confisca un cargamento di mas di 189 kilo di cocaina cu tabata wordo transporta abordo di un speedboat tipo GoFast riba Lama Caribe.
Un avion di Fuerza Aereo a detecta e GoFast aki cu 2 hende abordo, ta moviendo cu velocidad halto ta bandonando Colombia y ta riba lama grandi caba ta bay. E momento ey nan tabata como 300 kilometer pabao di Aruba.
Guardacosta cu sede na Santa Marta, a move den e direccion, y nan a saca nan Speedboat di Rapid Response, cu a bay nan tras y a asina a start un persecusion hopi panort di Riohacha na La Guajira.
Finalmente e GoFast a stop di core, y asina autoridadnan Colombiano a yega y bay abordo. Abordo tabatin un colombiano y un dominicano, kendenan a wordo aresta. Nan tabatin abordo ocho bulto grandi di droga, den cual tabatin 189 paki yena cu cocaina. Nan a haya un arma potente tambe cu dos cartucho y bala.
Nan a lastra e boto bek pa Colombia pa asina cuminza cu investigacion. E dos tripulantenan a basha abao cu nan tabata rumbo pa Republica Dominicana cu e droga.
E cocaina a yega na un peso di 189.700 gram. E boto y e droga a wordo confisca, y e dos personanan awor ta deteni. E potret aki pa cortesia di Armada Colombiano.
