ORANJESTAD (AAN): Manera conoci, Stichting Fuente a presenta un herment digital pa votado di Aruba por medio di e proyecto Stemwijzer cu un sistema sofistica den guia di voto pa brinda e votado sosten pa tuma un decision educa.
Durante e temporada aki cu a lansa e proyecto Stemwijzer Aruba 2021 na comienso di luna di Juni 2021, tabata tin un cantidad di 12,100 usador cu a haci uzo di esaki. E Stemwijzer local, esta votaruba.org, ta un colaboracion entre Stichting Fuente y ProDemos. Fuente ta un colectivo di studiantenan Arubiano y hobennan profesional cu ta biba na Hulanda, pero ainda ta carga un amor grandi pa nan isla.
ProDemos ta e desaroyado di e Stemwijzer na Hulanda y ta traha cu organisacionnan rond di mundo. ProDemos ta un fundacion independiente, 100% confidencial y neutral, cu e meta pa informa hende y involucra nan den e proceso democratico, na unda privacidad di votado ta salvaguardia.
E relacion di cooperacion ta basa riba compromiso di miembronan di Fuente riba un base boluntario, hunto cu e infrastructura digital y experticio di ProDemos.
Pa kico e herment aki ta existi?
Un cos cu nos semper ta scucha prome cu eleccion: ‘mi no sa ainda pa ken mi ta bay vota.’ Mayoria di biaha, hopi hende no sa pa kende nan lo deposita nan voto pa falta di informacion di e partidonan, of tambe un parti esencial ta e conexion cu e partido of candidato; si tin cosnan en comun cu bo y bo pensamentonan tocante cierto ponencianan.
Votaruba.org su Stemwijzer ta un sosten brinda na e votado na caminda pa eleccion, na unda cu despues di contesta algun proposicion, ta mustra e usuario cua partido ta identifica mas cu ne basa riba ideologia. Por medio di e resultadonan, e usuario por orienta su mes mas extensivo riba e posicionnan di tur partido y revisa tur otro informacion.
Di parti di Stichting Fuente ta felicita e isla di Aruba cu su eleccion parlamentario y ta gradici cada un cu a haci uzo di e hermit pa haci un decision mihor informa. Bishita votaruba.org y pasa riba nos FAQ-area pa asina haya mas contesta na preguntanan cu nos ta ricibi frecuentemente.
