Un proyecto nobo lo start prome na Savaneta
ORANJESTAD (AAN): Bon noticia pa pueblo! Mary Joan Foundation ta lansa un proyecto nobo di salud cu e nomber “Chekeo den Bario”. Cu e iniciativa aki, e fundacion ta busca di trece cuido di salud mas cerca di nos comunidad y baha e barrera pa bishita un dokter di cas.
Nan lo cuminsa na Savaneta riba Diasabra 25 di April 2026, na MFA Savaneta, for di 8:00’or di mainta te 12:00’or di merdia. Despues di esaki, e proyecto lo sigui tur luna den un bario diferente.
Meta di e proyecto: Meta principal di “Chekeo den bo Bario” ta pa haci cu atencion medico bira mas accesibel pa tur hende.
Mary Joan Foundation a nota cu alrededor di 20% di e bishitantenan tin un anomalia of irregularidad den nan pecho. Den e caso ey, nos dokternan ta referi nan mesora na dokter di cas pa investigacion y examen adicional.
Participacion ta completamente gratis, y no ta necesario pa bo ta inscribi na AZV pa participa den e chekeo aki.
Chekeo tambe ta pa hende homber: Mary Joan Foundation kier pone enfasis cu e chekeo aki ta destina tanto pa hende muhenan como pa hende hombernan. Hopi biaha hombernan ta pensa cu chekeo di pecho ta solamente pa hende muhe, pero esaki no ta berdad. Hende homber tambe por tin irregularidadnan y mester presta atencion na nan salud.
Nan ta invita tur habitantenan di Savaneta y San Nicolas pa pasa y haci nan chekeo. Si bo ta prefera pa haci bo cita adelanta, bo por manda un e-mail na This email address is being protected from spambots. You need JavaScript enabled to view it..
Cu e proyecto aki, Mary Joan Foundation ta spera di yuda mas hende na un manera tempran, detectando problemanan di salud na tempo, y facilita acceso pa siguimento medico ora cu esaki ta necesario.
