Arthur Vallejo: --- ORANJESTAD (AAN): Apenas algun minuut despues cu dentista Hendrik Marsman a caba cu su rueda di prensa
den cual el a indica entre otro cu parlamentario Arthur Vallejo a haya trata preferencial y cu e mester baha como parlamentario, e representante di MEP den Parlamento mes a tene un rueda di prensa.
Vallejo a cuminza na papia un tiki riba su mes.
“Mi ta un dentista diploma na Universidad el Bosque na Colombia y registra na Aruba como dentista.
Mi ta tambe kaak chirurg y registra den Arubig como kaak chirurg, mientras cu actualmente mi ta parlamentario pa fraccion di MEP y presidente di Comision di Salud den Parlamento di Aruba, segun Vallejo.
El a sigui bisa cu e tin un pasion profundo pa su trabao y profesion y cu un drive profundo pa cumpli y satisface su pashentnan cu su trabao y su capacidad.
“No tur ora ta facil, pero keremi cu mi lo haci mi best pa logra cu gran mayoria di pashent sali cu un cara contento y hari for di mi clinica dental cu mi tin pa mas cu 10 aña caba”.
Ami no ta bringa, maltrata of haci drama cu mi pashentnan.
Mi no ta filma nan of mi empleadonan y pone nan den tur wowo publico ora cu tin un desacuerdo.
Mi kier tuma tempo pa bisa mi pashentnan danki pa e cooperacion y comprension cu mi no por tey pa nan den tur e orarionan normal di disponibilidad, debi na mi funcion actual como parlamentario, segun e parlamentario di MEP, kende a bisa tambe cu e ta sigur cu su pashentnan ta compronde e lucha cu e ta hibando, esta un lucha pa tur e profesionalnan yiu di tera y di nos region y e buskeda continuo di oportunidad pa traha y sirbi pueblo di Aruba.
Vallejo a sigui bisa cu e no tin problema cu calidad di awa di WEB y cu e no ta bende suplemento di awa.
El a bisa tambe cu e no tin ningun record di agresion fisico contra hende muher.
“Ami no ta core dump truck, mi no tin e mannan ta core maquinaria heavy duty, pasobra mi mannan ta delicado pa atende cu mi pashentnan y sigur pa haci ciruhia dificil”.
Ami no ta haci negoshi cu salud di hende y mi no tin contacto activo cu e departamento dental di AZV pa añanan largo.
Mi a acerca AZV su departamento dental na varios occasion den pasado y increibel pero berdad, no a logra establece e practica di kaakchirurgie pa Aruba via e seguro di AZV, pues sigur mi no ta kere cu mi ta un faborito den e departamento dental di AZV, segun Vallejo, kende a indica cu e no tin un contrato cu AZV y cu e no a firma pa introduci e ley di Arubig y cu ta minister di Salubridad y minister di Husticia a firma pa introduci e ley aki.
“Gobernador tambe mester firma y ami a colabora den aspectonan clave den e ultimo reformanan den e ley di Arubig, pero mi no a traha full e ley cu tur su detayenan y resolucion”.
“Ami lo pusha pa e lista di Universidadnan permiti den e ley di Arubig di Colombia, wordo amplia”, segun Vallejo.
El a indica cu e ta kere profundamente den esey y cu e no ta controla e lista aki.
Segun e parlamentario, ta solamente e minister di Salubridad por agrega nomber na e lista aki.
Prensa a puntra Vallejo riba e hecho cu Marsman a indica cu Vallejo a haya cierto privilegio, como cu e ta forma parti di un di e partidonan den Gobierno.
E parlamentario di MEP a indica cu si Marsman bisa algo asina e mester bin cu prueba y no papia so.
“Papia ta bunita, pero e mester bin cu prueba pa argumenta e cosnan cu e kier trece dilanti”, segun Vallejo.
