RIOHACHA: Tres turista stranhero cu tabata riba un yate ta drief como 2.8 miya leu for di costa di Colombia cerca di Riohacha,
a wordo rescata pa tripulantenan di Guardacosta cu sede na Santa Marta, segun marina Colombiano a indica.
Tur cos a cuminza draai ora cu yamada di auxilio a drenta via VHF Marine canal 16, cu ta e canal di emergencia. Marina Internacional na Santa Marta a ricibi esaki, y asina a haya sa cu e yate ‘Liberty C’ nabegando bao bandera Hulandes, a confronta dificultadnan mecanico durante su nabegacion, y asina a keda ta drief den e area general panort di departamento di La Guajira.
Mesora autoridadnan a ehecuta e draaiboek di buskeda y rescate, y a saca un unidad di reaccion rapido (URR) rumbo pa e yate aki, siguiendo e coordinadonan duna pa e stacion di Control di Trafico Maritimo. Asina a haya sa unda e yate ta, y rescata e tres turistanan stranhero cu ta den bon estado di salud, segun Marina. A duna nan algo di bebe y a nota cu nan no tin herida.
E turistanan rescata, cu ta dos Hulandes y un Australiano, a caba di sali for di Waf di Santa Marta y tabata rumbo pa Republica Dominicana. Asina a lastra e yate bek pa waf na Riohacha.
Segun Marina Colombiano, nan lo sigui cu e desaroyo di patruyahe maritimo pa salbaguardia bida humano riba lama, y nan tin tur unidad y training pa su personal pa atende cualkier emergencia cu presenta riba lama.
