ORANJESTAD (AAN) – Departamento di Imigracion y Maneho di Stranhero “DIMAS”,
a yama un conferencia di prensa, cu a wordo dirigi pa señora Marilyn Wout, Funcionario di Informacion y Relacionnan Publico.
Wout a cuminza pa informa y splica, con e proceso y uso di e carta di re-entrada ta anda. Ademas, pa haci un yamada pa na momento di entrega cualkier peticion, haci esaki completo.
“Manera nos tur sa, e temporada di vacacion ta den porta y hopi hende ta preparando pa bay biaha, pero tambe tin hopi permiso cu mester wordo renova, anto pa e motibo aki nos ta pidi tur persona cu ta biahando, cu si nan no a entrega un peticion di renovacion di permiso, pa haci esaki na tempo prome cu biaha; y tambe, si ya a entrega esaki y ainda no a haya respuesta cu por haci uso di un carta di re-entrada”, Marilyn Wout a señala.
El a sigui bisa cu un di e beneficionan di entrega e peticion na tempo, por lo menos tres luna prome of un siman prome, entre mas trempan e wordo entrega, mas trempan e por cana su caminda.
“Den caso cu bo ta viahando y bo ta den exterior y bo tin tur bo documentonan gescan, bo por haci e peticion tambe online. Pues, no ta necesario pa bo ta fisicamente presente na DIMAS, pa entrega e peticion di permiso. Nos ta encurashando tur persona pa, por fabor, entrega esaki di forma online. E ta mas eficiente, y nos por ingres'e tambe den nos sistema mas lihe”, Marilyn Wout a remarca.
El a agrega cu tambe pa e personanan cu ta biahando den e temporada aki, ta wordo pidi cu si nan por haci un peticion di un carta di re-entrada nan por bay riba e website di DIMAS: dimasaruba.aw, download e formulario di re-entrada, yene, firme y hibe na un MFA y paga e suma rekeri. Na momento cu e persona tin e comprobante aki y a scan e formularionan, e ta bay riba e website di DIMAS den e parti di E-hard disk, comprobante di re-entrada, anto upload esaki y DIMAS lo proces’e den algun dia. Si e persona ta entregue alomenos un siman prome cu e biaha, e ta haye na tempo pa e biaha.
E personanan cu por haci uso di un carta di re-entrada, ta clientenan cu nan ultimo peticion di permiso, prolongacion, of cambio di garante, a wordo entrega prome cu e ultimo permiso a vence.
Tambe por pidi un carta di re-entrada, personanan cu a haci esaki pero nan a haya un negacion y a entrega un apelacion, pero ta wardando riba un contesta di DIMAS; tambe e personanan cu a entrega laat un renovacion di permiso of un cambio di garante, pero nan por prueba cu durante e ultimo cinco añanan nan tabata tin un permiso valido, y nan ta residente na Aruba y cu ta inscribi na censo. Mester tene na cuenta tambe cu un carta di re-entrada por wordo uza, solamente un biaha. Pues, cada bez cu e persona bay biaha y mester di un carta di re-entrada, mester haci e peticion di nobo.
Ademas mester corda cu e carta di re-entrada ta wordo otorga pa un periodo maximo di cuater luna. Na momento cu e persona bay biaha por indica pa cuanto tempo ta bay biaha, si ta pa mas di un siman of un luna pa algo medico, e ora ey DIMAS ta tene cuenta cune, señora Wout a menciona.
