Plan pa San Nicolas --- ORANJESTAD (AAN): Dia 7 di december, e Prome Conseho di Ministronan pa Gabinete Wever-Croes II a tuma luga na Nicolaas Store na San Nicolas.
Esaki ya caba tabata un tradicion cu Gobierno a cuminsa cu ne durante di Gabinete Wever-Croes I pa reuni na San Nicolas riba temanan di San Nicolas.
Prome Minister Evelyn Wever-Croes a duna di conoce cu e intencion ta pa Gabinete Wever-Croes II mantene e tradicion aki den e periodo di gobernacion nos dilanti. Durante e Conseho di Ministronan varios inversionista interesa den e desaroyo pa San Nicolas a duna presentacionnan hopi interesante di proyectonan grandi, mediano y chikito cu sigur lo trece desaroyo hopi importante pa Aruba y pa San Nicolas principalmente.
Marchong NV cu ta e compania cu ta representa e compania cu ta doño di e hotel Marchena a duna presentacion di nan proyecto na Conseho di Ministronan. Durante di e presentacion, Señor Marcelino Quandt a duna e mandatarionan e oportunidad pa nan cera conoci cu e proyecto y pa wak con por coordina cu otro pa haci e proceso di transformacion di Hotel Marchena mas lihe cu ta posibel.
Tambe a trata algun aspecto cu ta considera importante manera e proceso di vigilancia di banda di Polis pa yuda establece mas siguridad den e zona na San Nicolas. Un otro punto importante cu a trata ta e renobacion y traha un restaurant den dje.
Por ultimo sr. Quandt a bisa di ta contento cu e oportunidad pa por a presenta e proyecto y ta spera cu por reuni mas biaha pa realisa e proyecto mas miho y mas pronto cu ta posibel.
Prome Minister ta gradici Señor Marcelino Quandt pa su participacion y presentacion den e Conseho di Ministronan. “Desaroyo na San Nicolas ta necesario y importante pa henter nos pais y ta keda prioridad pa Gabinete Wever-Croes”, Prome Minsiter a enfatisa.
