ORANJESTAD (AAN): E siman aki ta tumando lugar na Miami Beach na Florida, e evento yama “Seatrade Cruise Global”,
cu ta wordo considera e evento mas grandi na mundo pa ehecutivonan di companianan crusero, y esnan cu ta duna servicio na companianan crusero. E ta un oportunidad unico pa por topa cu esnan na cabez cu ta defini e mundo y rumbo cu e industria di crusero ta tumando e aña aki.
E evento aki cu ta tumando lugar for di 8 April 2024 te cu 11 April 2024 na Miami Beach Convention Center, ta combina ademas di conferencianan, tambe tres dia di exhibicion di producto y servicio.
Aruba Ports Authority NV tambe ta presente na e conferencia di Seatrade Cruise Global, y e biaha aki na un forma magnifico. Esey ta debi na e hecho cu e CEO di Aruba Ports, esta Marc Figaroa, a wordo invita pa ta parti di e panelistanan di e sesion di conferencia titula ‘The Evolution of Destinations’.
E ta un oportunidad unico pa promove Waf di Aruba, y e isla en general, y tambe comparti detayenan balioso riba e importancia di desaroyo di port, awor cu e industria y mercadonan ta evoluciona cu tempo.
