ORANJESTAD (AAN) – E medidanan di prevencion pa enfrenta Covid-19, no ta algo nobo cu a cuminza cu e pandemia.
Desde e añanan unda hopi caso di Influenza a surgi, y incluso, algun persona a fayece na mundo (claro cu no na e magnitud di Covid-19), pa motibo di Influenza. Pues, ta medidanan protocolar cu a bin “in place” caba, aunke kizas e unico cu no a scucha e ora ey ta e uso di tapaboca, alomenos no cu enfasis.
Por ehemplo, na 2012, dr. Guisella Guzman, di e area di Salud Colectivo di e “Caja Costarricense del Seguro Social” a reitera e medidanan aki den e revista “Bien Estar”, lo siguiente: “E clave pa logra y mantene un salud optimal, ta cuminza cu e propio cuido.
E bon habitonan ta yuda mehora e calidad di bida y preveni malesanan contagioso, manera labamento di man constante, limpieza y desinfeccion di superficie y utensilionan, manipulacion corecto di fruta y berdura, distancia di otro personanan si bo, of nan, ta nister y/of tosa. Esakinan ta medida economico capaz di reduci malesanan infeccioso-contagioso manera esnan respiratorio (Influenza), diarea, etc., te cu 90%”.
E bienestar y style di bida saludable ta parti di e higiene y aseo individual pero cu tambe ta yuda e colectividad. “Bal la pena rescata e spirito di un frase emiti den un documento cu ta promove e custumbernan corecto na nivel mundial. ‘E salud ta wordo genera ora ta devolve e hendenan e poder pa efectua e transformacionnan necesario, pa asegura un bon forma di biba. Asina lo reduci e causanan cu ta atenta contra cada ken su propio organismo”, el a indica.
