Tyson Lopez, Manager di Recreacion Sostenibel di FPNA:
ORANJESTAD (AAN) – Señor Tyson Lopez, Manager di Recreacion Sostenible di Fundacion Parke Nacional Aruba, a duna di conoce den entrevista cu DIARIO, cu Mangel Halto lo conoce un cara nobo cu palapa nobo y drechamento di e lugar cu reglanan.
El a duna di conoce FPNA a wordo acerca pa Aruba Tourism Authority, cu e pensamento pa nan restaura e palapanan cu den pasado a wordo kima of vandaliza y a keda den mal estado.
FPNA a bisa ATA cu ta bon, cu nan ta wak con pa haci esaki, alomenos pa pone nan miho di loke nan tabata.
Lopez a declara cu nan a cuminza for di aña pasa caba cu un par di foundering y otro gazebonan, y aworaki nan ta pasando pa e parti central pa nan por traha e foundering, y asina, despues nan por sigui construi e palapanan.
El a agrega cu pa FPNA ta importante pa mantene un balansa entre e parte natural y parti recreacional pa e bishitantenan cu ta frecuenta e area, y e comunidad tambe por bay wak cu e palapanan ta mas central. Kiermen, ta menos leu di e mangelnan y esaki ta pa duna e mangelnan pa crece bek tambe.
“Den pasado hopi hende tabata sinta den e magelnan y coba den nan. E idea ta pa trece e palapanan mas cerca y otro central, pa e mangelnan por haya nan espacio pa crece bek”, Tyson a reitera.
E area aki lo haya gazebo cu ta mas grandi y ta carga mas hende, mientras cu e palapanan ta riba e costa so ta haya nan. Nan tin den consideracion e cantidad di persona pero tambe esnan cu por ta den naturaleza prome cu bira hopi hende.
P’esey e area central lo bay tin cuater gazebo y e areanan na banda lo bay tin cinco gazebo. Hunto cu e proyecto aki, ta bay pone borchi cu regulacion pero tambe pa educa e comunidad riba e importancia di e mangel, e yerba di lama, e santo, e pahranan cu ta biba den e area tambe, y ta bay tin na entrada tres diferente señal, cu ta bay splica un tiki mas, pa educa nos comunidad pa di su banda contribui mas na conserva e naturaleza.
