Cambio di Gobierno no por supera e base legal di maneho financiero
*Pa scapa di supervision Hulandes mester tin castigo pa abuso di placa
*Rapport “Bo Aruba”a papia idioma cla di kiebra serio di Ley
ORANJESTAD(AAN)—Cu cambio di Gobierno, un punto ta na discusion atrobe, cu ta e maneho cu ta wordo hiba dor di proximo Gobierno y si nan lo sigui cu e maneho cu supervision Hulandes a exigi despues cu na 2014 Aruba tabata ya den estado di bancarota.
E forma cu un Gobierno por gasta placa di Pueblo, no ta mara na deseonan politico pero mescos cu tur otro asunto di e estado democratico di Aruba, ta basa riba exigencianan di Ley.
Ora tuma nota di e forma cu asuntonan financiero di Aruba a wordo atende, loke a resulta den un saldo positivo pa Aruba, mester conclui cu esaki ta e exigencia di Ley di Contabilidad cu ta haci husticia cu e Pueblo cu ta pagador di belasting.
Un saldo positivo ta papia di un bon maneho di placa, cu ta permiti cubri debenan y necesidadnan di e pais, manera awor a bira visibel na Aruba, cu ta mira por ehempel con a baha e peso di belasting pa un grupo grandi den comunidad.
Reino Hulandes ta basa riba Monarquia Constitucional, cu ta nifica cu Rey ta Hefe di Estado, cu ta wordo dirigi a base di leynan, pues den e caso aki di Constitucion.
Cada aspecto di gobernacion di Reino Hulandes y di paisnan cu ta forma parti di Reino Hulandes, ta mara na stipulacionnan hancra den Leynan cu ta proteha directamente e bienestar di e pais y e habitantenan di e pais, cu pa por funciona ta depende di placa cu ta wordo entrega dor di ciudadanonan.
Segun Statuut, Gobierno di Reino mester ta duna e garantia cu e paisnan den Reino ta wordo bon maneha. Esaki ta mara tambe na e realidad cu Reino ta na defensa di e bienestar di e ciudadanonan di Reino, cu mester por wordo sirbi cu entradanan di e pais y e maneho financiero, cu ta dicidi pa e calidad di e pais.
Cu Leynan di Bon Gobernacion ta wordo kibra dor di gobernantenan, ta keda confirma sigur den e Rapport riba e proyectonan “Bo Aruba”, cu continuamente ta mustra con a kibra e Ley cu ta regla e forma cu ta gasta placa di Pueblo, cu ta e Ley di Contabilidad.
E ta prueba pa e motibo pa cual Aruba a perde e parti tan importante di su Status Aparte, cu ta e autonomia di Aruba pa maneha su propio asuntonan financiero, cu a cuminsa na 2014 ora Hulanda mester a pone Gobierno di Aruba bao supervision financiero, loke ta nifica exigi pa Gobierno di Aruba cumpli cu e Ley di Contabilidad.
Un cambio di Gobierno no por trece cambio den e stipulacionnan di Ley di Contabilidad atrobe ya cu awor e Ley di Supervision di parti di Reino ta na vigor, loke ta na interes directo di e Pueblo cu ta paga placa di belasting, cu mester wordo uza di acuerdo cu Ley pa e sirbi e prosito di Pueblo.
Na e momento cu Aruba conoce un Gobierno nobo, e supervision di Reino ta continua y den esaki pues mester tene cuenta cu loke e Comision di Supervision di Reino a trece dilanti, cu mester duna continuacion di e maneho cu Aruba a conoce.
Tur gobierno cu asumi su responsabilidad na Aruba, ta keda mara na e exigencianan cu Hulanda a base di Statuut mester a introduci a base di e caos financiero cu Aruba a conoce te 2017.
Ya cu placa ta dicidi pa un maneho total di Gobierno, e proximo gobernacion mester ta a base di austeridad y reglanan den cuadro di e Ley di Contabilidad, cu lamentablemente no conoce un cuadro di castigo pa e gobernantenan envolvi, cu ta causa daña directo na e bienestar di Pueblo.
DIARIO ta confirma publicacionnan anterior cu e proximo Gobierno, forma pa cual partido cu e por ta, mester tene su mes na e base legal cu ta wordo fortifica directamente pa supervision Hulandes pa evita abuso di e placa cu Pueblo mester entrega na belasting pa gobernacion di e pais.
