ORANJSTAD (AAN): Diaranson mainta, Minister di Husticia mr. drs. Arthur Dowers, a tene un conferencia di prensa den cual e mandatario encarga cu e maneho di admision y stranheria,
a duna un update di su maneho te cu awo. DIMAS, como entidad cu ta atende y otorga permisonan di estadia y trabao, a conoce un aña relativamente druk cu hopi mas peticion cu a ricibi compara cu añanan anterior.
Pa 2025, DIMAS a procesa te cu fin di October, 20.977 peticion cu ta consisti di 8.863 prome peticion, 7.772 peticion pa prolongacion, 2.884 peticion pa haci cambio y 1.458 peticion pa declaracion pa status di LTU.
Pa locual ta trata e proyecto di Hunto Pa Progreso, pa e trayecto 4 cu a keda anuncia na comienso di october, DIMAS a registra 859 peticion, di cual 395 so ta aparece den e sistema como paga mientras 464 ainda no a cumpli cu e pagonan necesario pa e proceso continua.
Riba e punto aki, Minister Dowers kier a enfatisa cu si no haci pago, e peticion ta keda para te ora cu cumpli e a fase aki den e proceso di peticion.
E top 5 paisnan di origen di personanan cu ta haci peticion pa permiso ta Colombia, Venezuela, Republica Dominicana, Hulanda y Haiti mientras e edad average di personanan cu ta entrega peticion pa permiso ta 35 aña. E funcionnan pa cual a haci mas peticion ta pa trabao domestico "inwonend", limpiesa, metselaar y den cushina como cook of cook helper.
Entre trayecto 1 y trayecto 4 di Hunto Pa Progreso, hunto ta yegando 5.000 peticion di permiso. Minister Dowers a enfatisa cu november y december ta e ultimo dos lunanan di Hunto Pa Progreso y ta urgi tur esnan cu a drenta Aruba prome cu 1 di juli 2025 a traves di Aeropuerto Internacional Reina Beatrix y cu ta cumpli cu tur rekisito stipula, pa probecha di e oportunidad unico aki cu Gabinete AVP-Futuro ta duna.
Ta importante pa realisa cu e aplicante mester registra su peticion prome cu 31 di December 2025 pa e por forma parti di nos comunidad di forma corecto sin necesariamente a ricibi su permiso prome cu e fecha di 31 di December 2025.
