Xavier Ledee di St. Barths:
ORANJESTAD (AAN): Durante di e Conferencia Ministerial di e 21 edicion di Overseas Countries and Territories – European Union Forum, Presidente di Conseho Teritorial di St. Barths (oficialmente yama Saint-Barthelemy), Xavier Ledee, a enfatisa e importancia di cooperacion entre teritorionan ultramar pa enfrenta reto comun.
Durante su participacion na Aruba, Ledee a destaca cu temanan manera transicion di energia, cambio climatico y proteccion di medio ambiente ta central pa e agenda di islanan manera Saint-Barthelemy.
“Nos ta enfrenta reto similar manera horcan, subida di nivel di lama y presion riba medio ambiente,” segun Ledee.
El a subraya cu fortalecemento di partnership cu Union Europeo y otro miembro di OCT ta esencial pa logra progreso sostenible. “Hunto nos ta mas fuerte. Nos tin interes comun y nos mester traha hunto pa proteha nos medio ambiente,” el a declara.
Ledee a pone enfasis riba e importancia di intercambio di conocemento entre islanan, señalando cu cada teritorio tin su propio experiencia cu por beneficia otronan. “Nos mester comunica y comparti mas informacion riba solucionnan practico cu ta funciona den cada isla,” el a indica.
Segun e lider di St. Barths, tema manera maneho di desperdicio, produccion di awa y planificacion urbano ta reto concreto cu islanan chikito mester atende cu solucion innovador y sostenibel.
Un punto importante menciona durante su declaracion tabata e progreso reciente dentro di OCTA, caminda, segun Ledee, e organizacion a logra fortalece su base financiero.
“Awor nos ta den un posicion mas fuerte pa move dilanti y sirbi nos teritorio mas eficiente,” el a señala, reconociendo e rol di Aruba den e liderazgo di e asociacion.
El a conclui cu, apesar di distancia geografico, e islanan ta profundamente conecta. “E lama no ta separa nos, pero ta uni nos. Nos tin un historia comun y interes comparti,” segun Ledee.
E participacion di Saint-Barthelemy den e foro ta resalta e importancia di colaboracion regional y internacional pa logra solucion sostenibel y fortalece resiliencia di teritorionan ultramar.
{gallery}Maneho di desperdicio, produccion di awa y planificacion urbano ta reto en comun{/gallery}
