MEDELLIN: E cantante colombiano J Balvin a divulga Diasabra atardi, cu su mama Alba Mery Balvin a haya OK di Docternan pa e bandona Hospital.
E tabata interna den ICU debi na complicacionnan a consecuencia di contagio cu Covid-19.
E artista a haci e anuncio via di su Instagram, unda el a mustra con feliz e ta cu e noticia. El a haci esey ora cu el a bay busca su mama na e Hospital na Medellin.
Riba e potret bo por mira su mama sinta riba un rolstul, net ora cu e tabata prepara pa bandona e Hospital.
“Nos a gana e guera,” J Balvin a bisa mientras cu e muher ta yorando di emocion pa cu e noticia. “Esakinan si ta gueranan di berdad. E uniconan cu ta bale la pena,” e artista a bisa riba videonan cu el a pone riba social media.
Despues e cantante a mustra e momento cu e ta den auto caba, y ta hibando su mama pa su cas. Den auto e ta hasta haci joke, cu e no ta bay hiba su mama pa cas, sino nan ta bay trip y diverti.
Pa hopi dia no por a tende nada di e salud di e mama. Ta J Balvin mes ta esun cu a confirma cu su mama a bira malo dia 18 di Februari y cu el a wordo hospitaliza y interna den Intensive Care.
