"Mi ta bay traha incansabelmente pa salbaguardia pa un 24 di Maart no ripiti"
*Baby a wordo poni boca abao sin supervision
ORANJESTAD (AAN): Tabata dia 25 di Maart 2022 cu un baby di apenas 4 luna, esta ‘Baby Noah’, a perde rosea y a fayece na Pasa Dushi Pasa Pret Peuterschool na Wayaca 132. Ambulans a yega den 2 minuut eynan y a cuminza traha riba e baby.
Prome informe ta mustra cu lo a laga e baby su so cu un cusinchi ta sostene un boter di tetero pa e bebe. Tur esaki ta berdad?
Señora Noemy Maduro, kende ta un conocido funcionario di Departamento di Asunto Social a tene un conferencia di prensa Diahuebs mainta na oficina di ATIA. El a haci esaki den presencia di Sr. Liberato Hoek di Ambulans di ImSan, y tambe Dr. Eric Arends, conocido pediatra.
Maduro a trece e informacionnan na un forma pa concientiza pueblo, y tambe prevencion si acaso algo similar por sosode den futuro atrobe.
Esaki tabata un momento hopi doloroso na unda e mama a comparti cada momento di cada proceso di e perdida di baby Noah. El a conta full e proceso di 2 mitar dia cu baby Noah a bay e crèche detayadamente, specifica y documenta.
Noemy Maduro a comparti cu desde cu baby Noah a yega crèche 7:15 am, te 8:00 am pasa, a keda sinta den un 'baby carrier'.
Noah a ser saca di e “baby carrier” y poni den e box y e trahado pedagogico a bira bay coi otro baby. Babykamer semper mester ta bow supervision. E accion di a saca e baby pone den otro ambiente cu ta e box, mester a wak ki e reaccion y accion ta y keda na tur momento den e babykamer.
Cada parti doloroso cu mama a describi, mama a sinta cu diferente dokter na mesa y a ser informa lo siguiente NO ta existi carrier, bonser, wieg, stoel di hala patras pa un baby di 127 dia cu su wervel kolom no ta ni forma ainda. NO mag di sali di babykamer, babykamer ta keda na tur momento bou di supervision.
Un baby ta ser poni boca bou "met bij zijn van een ander", cu presencia di un hende cu e baby, pa training di e garganta pa versterking y despues ta ser poni na e unico forma cu ta pone un baby di 127 dia di banda, batiendo suave riba su lomba.
911 ta ser yama prome na momento di cualkier situacion despues mama, den e caso aki ambulance tabata 2 minuut leu di e crèche.
E mama a sigui bisa cu a pone baby Noah boca bou y a comparti cu e mes como trahador social, e sa cu e tey pa yuda, pero den e caso di baby Noah, no a yama 911. Esaki mirando cu e mes, personalmente a haya yamada e dia ey pa 8:33 am.
Ambulance ta keda 2 minuut leu for di e crèche, pues ambulance por a yega basta lihe. E mama a sigui conta cu el a yama 100 y a ser confirma despues cu ta polis Wouters, kende na su turno a yama 911, y pa 8:37 am e “first responder” a sali y a yega 8:39 am na e crèche.
Hefe di Ambulans Sr. Liberato Hoek a conta e proceso di nan di ambulance con e melding a drenta y con e proceso a bai pa cu baby Noah.
Pediatra Eric Arends a conta resultado di autopsia cu ta bisa cu cada organo di baby Noah ta “zonder afwijking” y cu baby Noah ta un “gezonde zuigeling” di 4 luna y 7 dia.
Noemy Maduro, a expresa riba e importancia di traha hunto, c'un solo meta: concientisacion y prevencion.
“No por tin isla isla band’i otro cu e mesun meta, djis imagina of pensa cu diahuebs dia 24 di maart, bo yiu a bay. Bo no kier tin isla, toch bo kier cooperacion y colaboracion paso hunto so nos por y realmente ta tuma un comunidad pa lanta un mucha.”
Finalisando, Sra. Maduro a informa cu e ta trahando riba e meta aki y dentro di poco, e prome campaña ta sali di concientisacion y prevencion " Hunto nos por" y cu un dia humanidad por prevalece.
El a expresa "tanten cu e mama aki tin rosea, tin bida y tin salud, 24 di Maart no ta sosode mas, pasobra mi ta bay traha incansabelmente cu e departamentonan di gobierno y tambe esnan no di gobierno pa salbaguardia un 24 di Maart no ta ripiti".
SETAR a pone un number di telefon disponibel cu ta 699-NOAH (699-6624) unda por manda mensahe na Sra. Maduro. Ta bezig ta lantando un grupo di sosten. Ta bay ta bezig activo pa cu diferente actividad di apoyo, a remarca.
