MAICAO: Un yobida di hagel a keda registra den e parti zuid di departamento di La Guajira na Colombia. Esaki a socede banda di 1:30’or di atardi, segun habitantenan a raporta.
Un sonido fuerte tabata sona riba nan dak, y esey ta mas duro cu djis druppel di awacero. Y pafo a bin nota cu ta varios bloki y piedra di ijs tabata cay. Hopi potret a wordo poni riba social media.
Esnan cu a experiencia e fenomeno aki, ta di municipio El Molino. Hopi biaha yobida di hagel por causa daño na hende, na auto, y na propiedad. Pero oficialnan di El Molino a core rond y no a mira ningun novedad.
Hagel ta wordo forma ora cu druppelnan di awacero ta wordo carga y hiba na halto door di bientonan fuerte den un tormenta electrico. E druppelnan aki ta yega den areanan extremadamente frieu di atmosfera y nan ta congela. Nan ta sigui bira grandi door di keda dal cu mas awa liquido cu ta congela na e superficie di e hagel.
Na spaño, hagel ta wordo yama ‘granizo’. Pueblo di El Molino ta situa como 370 km Zuid-Zuidwest di Aruba.
