Tecniconan di SETAR hopi druk te ainda:
*Algun cas e Wi-Fi Extender a kima
ORANJESTAD (AAN): Dialuna for di trempan, basta cliente di Setar NV a bay para na porta tanto di e edificio central na Seroe Blanco como na Santa Cruz y Playa, pa hiba nan aparatonan di internet cu a kima, diasabra marduga, debi na awacero fuerte cu lamper y strena cu a dal duro y sorprende nos comunidad.
Hopi cliente no a cay na cuenta cu e modem y extender di SETAR cu ta provee di internet, a kima sino te ora nan a lanta y ripara cu no tin internet, ni telefon fiho y cu televisor tampoco ta cende.
Nan a scucha banda di 1’or di marduga si, un sonido masha fuerte pero a kere cu ta pafo di cas, debi na e awacero cu lamper y strena, pero realmente tabata paden di cas. Lamentablemente, no tur hende a desconecta e plugnan pasobra no a pensa cu algo asina por a pasa y no tur caminda coriente a bay.
Diasabra SETAR practicamente no a atende yamada. Segun un empleado di e compania mes a bisa e clientenan cu e tecniconan tabata hopi druk tratando di duna servicio mas tanto posible, na e diferente lugarnan unda nan sa cu e cabelnan di SETAR a haya problema y e barionan a keda sin conexion.
DIARIO mes a wordo informa, den e branch na Playa, cu dialuna mes durante e dia e tecniconan lo a sigui bay na e diferente adresnan unda nan sistema di internet a cay por completo pa cambia e aparatonan cu a kima cu e modem nobo, pa bolbe brinda e servicio.
Tin hende cu a nan televisor mes a daña, y tin cu hasta a perde nan frishider y aire acondiciona, den hogarnan unda cu coriente mes no a bay.
Tin barionan unda cu coriente a bay di manera cu NV Elmar su tecniconan tambe mester a traha incansablemente pa soluciona e problema cu a afecta nos comunidad hopi.
E empleadonan di SETAR, mester bisa si, cu a atende e clientenan hopi lihe y cu un actitud di comprension excelente, pasobra tin personanan cu tabata poco “rabia” cu e compania no a atende telefon diasabra, pero berdad ta cu dilanti fenomenonan di naturaleza repentino, cu ta ocasiona dañonan material, ningun hende por yuda.
Lo ta bon pa sigui tene cuenta cu loke a sosode, pa na momento cu mustra cu mal tempo ta bin bek, y cuminza wak cu tin lamper y strena, mesora desconecta, saca plug di tur aparato electrico for di coriente, incluyendo frishider y airco, y sigur esnan di SETAR. Asina por evita un situacion desagradable manera a sosode den fin di siman cu a pasa.
