Segun señor Rino Hermans di CMO:
ORANJESTAD (AAN): Segun señor Rino Hermans, Director di Crisis Management Office (CMO), den e ultimo temponan aki, medionan social ta un di e preocupacionnan di mas grandi di e departamento. E medionan aki ta mal informa comunidad door di personanan mas bien aficiona riba e tema cu tin di haber cu maneho di disaster pero cu no ta profesionalnan cu ta profundisa nan mes den e material aki. Esaki, el a expresa, ta creando panico den comunidad.
Awendia, tin asina hopi App disponibel y hopi ciudadano ta haci uzo di esakinan pa haya notificacionnan pa horcan of temblor. Señor Hermans a indica sinembargo, cu un temblor no ta avisa cu e ta bin mescos cu un horcan. Ta ora cu sinti esaki, un App ta avisa di cuanto magnitud e tabata. El a remarca cu si un temblor sosode den subsuelo di Aruba, ningun hende lo no tin mucho tempo pa wak e App mientras ta buscando proteccion p’e mes y pa su famia.
Señor Hermans a agrega cu CMO y Meteo ta e unico dos organizacionnan oficial pa trata menazanan di naturesa. El a expresa cu tanto prensa como cualkier ciudadano, por acerca nan pa haya informacion corecto enbes di busca y difundi noticia falso y robes.
CMO, segun Hermans, desde 2013 ta educa pueblo riba temblor y tsunami hunto cu UNESCO, cu a reconoce CMO un di e organizacionnan campeon den Caribe. Durante e ultimo 9 añanan, e di tres diahuebs di maart, ta haci e trainingnan necesario y ta promove evacuacion nacional. UNESCO a reconoce CMO tambe como e unico organizacion di disaster cu a train scol di ciudadanonan special na unda tur a evacua pareu.
“Unesco a reconoce CMO, awo Aruba mester reconoce nos y no bay den panico y no sigui tur informacion cu tin rond specialement riba medionan social, pasobra no ta tur ta informacionnan corecto”, señor Hermans a enfatisa.
Pa conclui su entrevista cu DIARIO, señor Hermans ta haci apelacion na comunidad, pa sigui instancianan oficial. CMO semper a y ta keda informa y ta mantene prensa cu e noticia concreto y corecto. Y na su banda, ta keda na pueblo tambe pa sigui e canalnan oficial y corecto.
“Pasobra nos tarea no ta pa trece panico. Nos tarea ta pa avisa pa prepara”, señor Rino Hermans a enfatisa.
