Control di higiene y calidad ta husto y necesario:
ORANJESTAD (AAN) – Mirando un costo di bida excesivamente halto na Aruba, tin consumidornan cu ta acercando mesa di redaccion, pa comenta kico nan a, y ta experiencia como consumidor y cu ta mustra cu calidad di servicio ta bayendo atras, no tin control, y si nan reclama na un negoshi nan no ta worde bon trata.
Un caso preocupante a worde relata pa un famia cu a bay come na un restaurant ubica prome cu yega e rotonde di Cumana, cu tabata hopi bishita pa e famia aki prome cu nan a pasa den un situacion hopi fastioso. Cuminda cu nan ta bende ta exotico y hopi gusta vooral pa clientenan arabier.
Ora cu e famia a pidi nan cuminda, no solamente a ripara cu el a bira hopi mas caro, pero nan a mira con cacalaca tabata sali for di e airblower unit di e airconditioning. Mesora nan a yama e persona cu a trece e cuminda pa nan y bise cu esey ta algo hopi mahos pa mira, y a puntre si nan ta fumiga regularmente. E persona no a ni worry pa bisa “sorry” ni a yama e gerente ni nada. No a haci net nada.
E famia a sali bay disgusta y a laga e asunto asina. Un par di siman despues nan a topa cu un amistad cu a bin for di otro pais, y cu ta arabier. E tabata tin gana di come e cuminda exotico y e famia a invite na e mesun restaurant, sperando cu nan no ta bay tin ningun problema di higiene. Atrobe, e situacion a ripiti. Sinta na otro caminda nan a bolbe wak cacalaca ta sali di e airco dal keiro riba e muraya. E bishitante mes a keda sorprendi. Nan a bolbe keha pero e biaha aki nan a sali for di e lugar sin cumpra nada. E persona cu a ricibi e keho a bisa nan cu e cacalaca a sali di e airco pero den cushina no tin. Con e clientenan por ta sigur cu den cushina no tin contaminacion si a mira cu den e lugar tin cacalaca y nan no ta haci nada? Un bez por pasa, pero mas vez? Aparentemente, no ta e famia aki so a confronta cu e problema pero tin mas hende cu a retira como cliente di e lugar.
Fruta cu smaak na insecticida: E situacion no ta algo nobo. Hasta minister di salud ta na haltura pero te dia di awe nada a worde haci door di Salubridad Publico. Un consumidor a cumpra fruta den un supermercado chikito den e bario di Meiveld paden. Ora el a yega cas pa duna su yiunan fruta, el a sinti e holo stinki na insecticida y e fruta tabata incomible, pues ni labando e bon e smaak na un sorto di habon no a kita. Pero tambe nan ta haye den pan y beleg. Increible!
Un dos aña pasa cu e tema aki a bin dilanti, varios publicacion a worde duna via prensa (e.o DIARIO), tocante e insecticida cu nan ta uza den hopi supermercado chikito y cu tin efectonan nocivo pa salud. Na Santo Domingo, por cierto, a yega di cera un rij di tienda chikito di comestible, pasobra algun mucha a para na hospital cu diarea y sacrament, debi na e mesun habito aki di uza tal insecticida. Na Aruba, nada ta worde haci!
