ORANJESTAD (AAN): NAB cu ta para pa NATIONAL ASSOCIATION OF BROADCASTERS, ta presenta e convencion mas grandi di medio di comunicacion,
esta radio y TV y awor tambe social media. NAB ta tene nan convencion anual na e splendoroso ciudad di Las Vegas, Nevada.
Cu un asistencia di rond di 65 mil profesional di radio, TV y otro media, NAB Convention ta e show mas grandi pa media, entretenimento y tecnologia na mundo. Las Vegas ta conoci pa ta un epicentro di atraccion grandisimo pa adulto, pero tambe e ciudad di hotelnan luhoso y magico. Cu e hotelnan mas exotico y atraccionnan cu e bista humano a yega di mira; e ta bira awo tambe e centro di encuentro mas grandi pa radio y TV y medionan social topa.
E ultimo desaroyonan tecnologico lo ta na bista, como tambe sesionnan interesante riba con pa mehora, desaroya bo habilidad den programacion digital di media en general.
"Na NAB Show ta duna bo e prome bista di e innovacion den tecnologia y producto nobo cu bo lo mira na e show, hunto cu e punto di bista di e exhibidornan y eventonan cu ta pasa na e convencion 2025 aki,” asina director di Magic FM, Erin Croes a expresa prome cu salida.
Magic FM cu ta cumpli 27 aña den e luna aki di april, a dicidi di bishita e convencion aki un biaha mas. Croes: “Si no ta pa NAB, mundo no ta keda na altura di tur e desaroyonan tecnologico cu ta existi y kico tur ta e posibilidadnan den futuro. Cu mas di 1800 exhibidor, bo ta haya chens di topa tur e distribuidornan, creadornan di programanan pa haci bo trabou mucho mas productivo y na vanguardia di tendencia pa media en general.”
E delegacion di Magic FM ta consisti di Erin Croes, Jacky Erasmus, Reno Irausquin y Dj Vibes Jean Carlos Henriquez cu ta maneha y opera e emisora na un forma diligente y a haya e oportunidad di bay NAB e biaha aki.
Semper purbando di trece idea innovativo y t'e caso un biaha mas pa sigura existencia pa largo di e emisora magico di Aruba. Nos amigonan den comercio cu ta inverti den nos emisora ta esunnan cu ta garantisa tur esaki pa Aruba su radio.
{gallery}Magic FM rumbo pa NAB 2025 na Las Vegas enfoca riba tecnologia, tendencia y futuro{/gallery}
