ORANJESTAD (AAN): E stacion di radio Magic FM 96.5 ta anuncia cu e programa navideño mas stima di Aruba, ‘Pasco Encanta’,
ta bolbe pa su di dos edicion a partir di diaranson awo 15 di october 2025. Bou di direccion y energia contagioso di su productor y anfitrion, Erin Croes, y su team magico, e show ta cla pa duna un experiencia mas grandi, mas profundo, y mas yena di amor di Pasco.
Pasco... mas cu un sentimento
Segun Erin, “Pasco ta mas cu un sentimiento; e ta un anhelo cu ta biba den curason di nos muchanan y e soño di esnan mas grandi cu ta prepara pa celebra.” E programa ‘Pasco Encanta’ ta destina pa yena e expectativa di tur esnan cu ta stima e temporada mas magico cu ta existi.
Pa e aña aki, e team di Magic FM a dicidi di trece un formato renoba, cu un ambiente fresco, y un jingle nobo cu ta keda den mente y ta identifica e show. Erin a introduci e concepto nobo cu e meta di crea un programa cu ta uni tradicion y innovacion: “Mi kier a inicia cu algo renoba, algo nobo y cu no ta ami so ta e figura principal, pero cu henter e team por presenta y duna un ambiente nobo na e temporada.”
Un team inspira y creativo
E show ta conta cu e participacion di Addonsito Croes, ruman di Erin, cu ta hunga un rol importante den e programa, treciendo preguntanan cu ta inspira y dibertido. Tambe Juffrouw Thyara Doornkamp lo comparti su dushi recetanan di Pasco cu lo lanta hopi sabor y nostalgia.
Un otro elemento emocional den e programa ta e storianan inspirador, cu segun Erin “ta hunga un rol integral den Pasco Encanta”, duna speransa y union durante e temporada. E identidad visual di e show ta recrea pa e artista local Mitch Almary di Final Format, kende a duna color y bida na e logo nobo di ‘Pasco Encanta’.
Un programa pa tur famia
‘Pasco Encanta’ lo presenta tema musical, tips pa decoracion di cas, recetanan navideño, storianan encanta, Andicuri Bunita y hopi sorpresa mas. E programa lo ta transmiti dos bes pa siman — dialuna y diabierna — entre 6 y 9 di anochi, tanto na radio como riba e plataformanan visual y televisivo. Lo tin transmision for di exterior y premionan fabuloso pa tur famia.
Pasco Encanta — un temporada di speransa, alegria y magia, solamente na Magic FM 96.5!
