AMSTERDAM: Un abuela di 76 aña di edad, a wordo gara cu varios kilo di cocaina na Aeropuerto di Schiphol ora cu el a yega riba un vuelo procedente di Suriname.
Douane na Schiphol a bin haya 5 kilo di cocaina wanta cu masking tape fuerte rond di su curpa. E droga aki riba caya tin un balor di algun 100 mil Euro.
E muher Surinameño a aparece dilanti Huez, pero esaki no ta e prome biaha. E madushi aki identifica como Irene, a yega di wordo gara 3 biaha caba den pasado na Schiphol ora cu e tabata transportando varios kilo di cocaina. E tabatin nan semper sea den su tas, of wanta cu tape na su curpa. Na Alemania tambe el a yega di wordo gara, y na Francia tambe su nomber a aparece como detenido pa caso di droga.
Desde 2009 el a wordo condena pa un total di 11 aña di prison debi na traficacion di cocaina.
Pasobra e ta un narcotraficante hopi conoci, autoridadnan di tur pais na Europa ta keda vigile asina cu e ateriza cu avion. Esey a socede tambe ora cu vuelo KL-714 a yega procedente di Paramaribo. El a wordo wanta mesora na Douane, y a bise pa bay cune na oficina.
E biaha aki el a bisa Huez, cu loke e ta haciendo no ta algo boluntario, pero e no kier bisa ta kende ta oblig’e na haci esaki. Pero si el a admiti cu nan a priminti’e cu e lo ricibi 4.000 Euro cash pa bira un mula pa transporta droga.
Fiscal den su requisitorio a indica cu ta claramente comproba cu el a trata di importa droga, y cu el a haci esaki pa hopi ocasion caba. Pesey el a pidi un castigo fuerte di 40 luna di prison, esta 3 aña y 4 luna.
Si acaso Huez bay di acuerdo cu e castigo ey, e ora e Madushi aki lo mester keda den prison te ora cu e cumpli 80 aña di edad. Huez lo dicta sentencia dia 2 di Juni 2022.
