Salida di Citgo a evita cu Aruba a cay den man di Nicolas Maduro
*Na 1982 e exigencia teritorial Argentino a bira guera Malvinas
*Expansion di teritorio ta directamente mara na regimen Comunista
ORANJESTAD(AAN)—“E reclamo di teritorio a base di historia of naturalesa, ta motibo di loke awe ta pasa na Ukraine y na varios parti di mundo. Na 1982, mundo a wordo confronta cu e Guera di Malvinas, Falkland Islands, dilanti costa Argentino. Historia no por ripiti.”
E hecho cu den un situacion mundial tenso, frontera cu Venezuela mester habri, ta un preocupacion grandi na Aruba, cu segun expertonan ta den mes posicion cu loke tabata origen cu Rusia kier anexa teritorionan cu e ta reclama mester forma parti di un imperio di pasado.
Na e momento cu Rusia a invadi Ukraine na 2022, el a duna prueba cu expansionismo a base di loke tabata existi den pasado, no a termina.
Uzo di origen y pasado ta uno di e motibonan grandi cu despotanan a uza den transcurso di historia, pa causa gueranan sangriente.
Na e momentonan aki Ukraine ta entrega na Aruba tambe un advertencia a base di e declaracionnan di Nicolas Maduro publicamente cu Aruba ta den awanan teritorial di Venezuela y cu e islanan ABC por wordo considera teritorio di Venezuela.
Di e forma aki e uzo di fronteranan maritimo a wordo presenta na e forma cu tabata cumbini Nicolas Maduro cu a perde su oportunidad di a haya poder economico grandi na Aruba pa medio di e proyecto di Citgo, cu lo a pone economia di Aruba den su man.
Den un situacion mundial di hopi problema, informantenan ta sigui mira e apertura di fronteranan di Venezuela como e topico mas importante pa atende na e momentonan aki, debi na e peliger cu e ta encera pa e pais.
“Aruba no mester lubida kico a pasa na 1982 na e Islanan Malvina, Falklands Islands, caminda guera a cuminsa a base di e exigencia di Argentina cu e islanan ta su teritorio. For di e momento Aruba mester a biba conciente di e peliger di Venezuela, cu a bira mas grandi cu nunca cu entrada di Chavismo comunista, cu ta basa su mes riba expansion,” a bini dilanti.
Cu Nicolas Maduro no ta respeta soberania di e islanan a bini claramente dilanti den e forma cu el a expresa su mes cu nan ta teritorio di Venezuela.
Manera a wordo trece dilanti dor di expertonan riba tereno diplomatico cu ta sigui tur desaroyo mundial den un mundo completament afecta pa e Guera na Ukraine, Reino Hulandes mester exigi pa Nicolas Maduro, publicamente retira su indicacionnan cu Venezuela por tin cualkier derecho riba e islanan ABC.
A wordo mustra cu ora fronteranan habri, no por comproba ta kende ta drenta Aruba y si nan ta siguidornan di Nicolas Maduro of no.
Rusia a logra anexa Crimea y e problemanan na Ukraine a start, dor di mobilisacion humano cu a encera cu sostenedornan di Rusia a penetra den partinan di Ukraine y asina a causa problema na e pais.
Na e momentonan aki mundo ta den un situacion sumamente dificil. Ayera Rusia a bolbe acusa NATO, na cual Hulanda cu ta un pais den Reino ta afilia, di a mete den guera na Ukraine.
Esaki mester wordo mira como un menasa pa mas problema ya cu Rusia ta acusa NATO di a mete den un guera, cu tur resultado cu esaki tin.
E cantidad di Arubiano cu no ta di acuerdo pa na e momentonan aki papia di apertura di e fronteranan cu Venezuela, ta keda considerabel sigur den e forma cu Nicolas Maduro claramente a mustra den pasado cu e islanan ABC ta pertenece na Venezuela.
Informantenan a mustra cu expansionismo ta directamente mara na comunismo, cu ta avanza cu forsa militar y opresion haciendo uso falso di historia por ehempel.
DIARIO lo sigui expresa tur loke ta biba cerca Pueblo di Aruba.
E pregunta grandi pa Arubianonan ta, pakico Nicolas Maduro a cera e frontera cu un reclamo sin base cu empresanan Arubano ta haci uzo di prijs barata di productonan agricola mientras tin scarcedad na Venezuela.
Bienestar di Aruba mester ta na prome lugar, ta e opinion cu ta reina den un situacion cu no ta duna ningun motibo palpabel na interes directo di Aruba, pa habri porta di Aruba pa Venezuela.
