Centro historico di Oranjestad a keda ilumina
ORANJESTAD (AAN): Den un ambiente festivo y yen di alegria, Prome Minister Mike Eman, hunto cu miembronan di gabinete, parlamentario, personal y otro invitado, a participa na e ceremonia di cendemento di luznan di Pasco dilanti di Bestuurskantoor, marcando cuminsamento di un temporada di union, gratitud y speranza. E aña aki, e iluminacion di Pasco ta cubri un area mas grandi cu antes, for di oficina di Gobernador, pasando pa Plaza Henny Eman, Parlamento y Bestuurskantoor. Esaki ta contribui na un ambiente special den centro di Oranjestad durante temporada di Pasco y Aña Nobo.
Durante su palabranan di apertura, Minister di Infrastructura Rene Herde a destaca cu e aña aki a opta pa extende e iluminacion di Pasco pa diferente parti di centro di ciudad, pa asina parti e alegria di e temporada di un esquina pa otro. Minister Herde a probecha e oportunidad pa gradici e diferente instancianan y empleadonan cu a contribui na realisacion di e proyecto, especialmente e personal cu durante lunanan a traha, incluyendo ora extra, pa prepara tur e decoracionnan.
Den su discurso, Prome Minister Mike Eman a destaca e significado profundo di temporada di Pasco como un momento di union, calor di famia, gratitud y reflexion. Segun Eman, ta un temporada pa aprecia e logronan di e aña cu ta acercando su final, pero tambe pa pensa riba e futuro y loke cada ciudadano ta desea pa Aruba den 2027. Prome Minister a probecha e oportunidad pa expresa su aprecio na cada un di e ministernan di gabinete pa nan esfuersonan y dedicacion pa mehora calidad di bida di pueblo di Aruba.
Na final di e ceremonia, Minister Herde a bolbe dirigi palabra na e presentenan, e biaha aki pa expresa un reconocemento special na Prome Minister Mike Eman. Na nomber di su coleganan minister, el a gradici Eman pa su guia, sabiduria, pasenshi y dedicacion durante su liderato di gabinete. Herde a describi Eman como un lider cu pasion, curashi y vision, cu ta demostra un compromiso profundo cu pueblo di Aruba. E palabranan di reconocemento a forma parti di un momento special durante e ceremonia, caminda a destaca e esfuersonan cu e miembronan di gabinete ta realisando hunto pa sirbi comunidad.
Prome Minister Eman a cera su discurso cu un mensahe di speranza, recordando cu e luznan di Pasco ta simbolisa e luz cu cada ciudadano ta carga den su curason. Un luz di union, amor y speranza pa un futuro miho. Cu e cendemento di luznan di Pasco dilanti Bestuurskantoor centro historico di Oranjestad a haya un ambiente festivo, marcando cuminsamento di un temporada di celebracion, gratitud y reflexion, cu e deseo pa paz, prosperidad y cambio positivo pa henter pueblo di Aruba den 2027.
{gallery}Luz di Pasco na Bestuurskantoor ta simbolisa union, speranza y un miho futuro pa Aruba{/gallery}
