ORANJESTAD (AAN): E wega ta simple! Bo ta escoge un number consistiendo di cuatro cifra, y bo ta agrega un signo zodiacal y asina bo ta cla pa participa.
Bo tin di djis indica ta cuanto placa bo ta bet, sea di 50 cent bay ariba.
Esey ta loke Luis a haci tambe! Cu djis un bet di 50 cent, el a bira e gran ganador.
Pesey riba Diaranson el a acudi na oficina di Lotto na Playa pa reclama su premio. Aki mesora e empleadonan a check si el a pone su firma na e banda patras di e ticket, y a scan e barcode. E computer inmediatamente a indica cu Luis a gana 12.500 Florin cu e wega di Zodiac Anochi.
Despues mesora a cuminza cu e proceso pa transferi su premio electronicamente pa su cuenta di banco.
Luis a indica cu e ticket ganador el a cumpra na Lucky Snoopy.