Den cuadro di celebracion 40 aña di existencia:
ORANJESTAD (AAN) – Señora Lucia Hoek, coordinador di actividadnan na Club Kibrahacha, den entrevista cu DIARIO a elabora tocante nan evento pa celebra coronacion di Reina y Prins cu Pancho, pa loke ta carnaval 71 di Aruba, y tambe a elegi su “best costume”.
E aña aki Kibrahacha ta celebra su di 40 aniversario, y awe por mira su 40 añanan refleha tur caminda, den e actividad di carnaval aki.
E reinanan y tur miembro a bin bisti cu e numbernan 40 riba nan petchi of trahe. Nan tabata tin eleccion di Reina cu cuater participante y nan mes a presenta hopi bunita. Lucia Hoek a pidi un aplauso grandi pa e adultonan mayor cu no obstante nan edad grandi nan por a haci cosnan asina bunita.
Tambe tabata tin siete participante pa miho trahe, traha pa cada un di nan mes na cas, y tabata algo hop bunita pa mira, señor Hoek a remarca.
Edadnan di e damanan participante ta varia entre 69 pa 89 aña, y nan Prins cu Pancho cu a goza y balia hunto cu e reinanan di Club Kibrahacha.
Lucia Hoek a gradici Irma Gordon cu a bin cu su grupo di hurado y MC. Tambe a gradici un empresa priva cu a haci donacion di regalonan pa e participantenan. Invitadonan special cu a haci nan presentacion tabata Culture Man y nan Reina di Tumba Jorienne Angela, ademas di Mama Sila, candidato cu a presenta pa Reina di Carnaval, y tambe e Reina Infantil. Señora Hoek a expresa palabranan di gratitud pa tur esnan cu tabata presente y duna sosten na nan celebracion di carnaval 71.
{gallery}Lucia Hoek, coordinador di eventonan na Club Kibrahacha hopi contento cu celebracion di carnaval{/gallery}
