ORANJESTAD (AAN): Segun publicacion di Directie Natuur en Milieu (DNM), e lora, e parha cu a bay den extincion y a disparce for di e naturalesa di Aruba,
ta reintroduci desde januari 2024. Na Ingles ta yama e sorto aki ‘𝗬𝗲𝗹𝗹𝗼𝘄 𝘀𝗵𝗼𝘂𝗹𝗱𝗲𝗿𝗲𝗱 𝗔𝗺𝗮𝘇𝗼𝗻 𝗽𝗮𝗿𝗿𝗼𝘁’ y su nomber cientifico ta 𝘈𝘮𝘢𝘻𝘰𝘯𝘢 𝘣𝘢𝘳𝘣𝘢𝘥𝘦𝘯𝘴𝘪𝘴 cu ta clasifica pa IUCN como ‘Critically Endangered’.
E parha aki ta crece te cu 33 centimeter y gran parti di su curpa ta color berde. E tin un pik ful blanco y su wowonan ta color oraño. Riba su frenta y rond di su wowo ta blanco. Su corona di cabes, rond di su orea y wowonan tin pluma cortico geel. Loke ta diferencia e lora Amazona barbadensis for di e otro loranan ta e plumashi color geel cu e tin riba su schouder. Y bou garganta y bou su bariga su pluma ta lombra color poco blauw. Ora su halanan ta habri pa bula por wak e rand di su pluma ta blauw scur y tambe color cora. E lora tin un voz fuerte cu ta inclui un grito cu ta tril.
E lora ta biba den un habitat seco manera seronan cu mondi unda tin hopi tuna, cadushi y hubada. Nan ta traha nan neishi den palo di mata cu ta halto y tambe den sker di piedra di calichi. Un lora por pone 2 pa 5 webo. Nan ta come fruta di mata di mondi, simia, flornan y hasta parti di taki di mata y top di cadushi.
Un lora por biba casi 60 aña den condicionnan faborabel pa su sobrevivencia.
E menasa mas grandi p’e loranan ta keda hende. Hende ta gara esakinan y hincanan den haula, otro ta gara nan y haci negoshi of contrabanda y otro ta tene nan como mascota.
Adicionalmente, e sortonan invasivo manera cabrito, djaca, boa, pushi y cacho ta menasa p’e existencia di e lora. Mester bisa cu e lora tin un balor importante den nos ecosistema. Nan ta yuda expande e biodiversidad pa medio di distribui simia di mata. Mas bunita ta pa laga e lora den libertad, yudando cu nan conservacion, asina futuro generacion tambe por tin nan pa admira den naturalesa.
𝐂𝐨𝐧 𝐀𝐫𝐮𝐛𝐚 𝐩𝐨𝐫 𝐲𝐮𝐝𝐚 𝐞 𝐥𝐨𝐫𝐚?
Si bo mira un lora, respet’e y mantene distancia, no purba di duna niun cuminda. Por raporta cu a mira e Lora via e whatsapp di ACF, e ‘wildlife hotline’,+297 592 4476.
Fuente: Facebook Page Directie Natuur en Milieu
