Parlamentario Misha Raymond, RAIZ:
ORANJESTAD (AAN)—Misha Raymond, di fraccion RAIZ, tin entendi cu desde cu AZV a cuminza, tin e lucha pa inclui Logopedie en e pakete basico di AZV. Esaki ta un necesidad cu ta den pueblo, y hopi di nos muchanan tine.
El a subraya cu e ta kere cu mester pensa mas tocante con bay structuralmente na stimula e desaroyo di nos muchanan, y di nos hendenan en general, pa e generacionnan nobo wak e efecto di esaki.
Misha a señala cu locual el a nota di Covid-19, y cu el a premira tambe, ta hopi problema di salud mental, depresion y ansiedad. El a indica cu for di prome cu Covid-19 tin muchanan cu por a desaroya problema di salud mas lihe y esaki por a amplia hunto cu Covid cu nan por a desaroya un trastorno.
El a splica cu Logopedie ta un di e diferente terapianan cu mucha y tur hende, mester tin acceso na dje, y e ta kere cu a duna un bon stap pa cuminza, mirando cu tabata tin e facilidad caba di AZV pa por a inclui’e den un LBHM. “Pero tin masha hopi cos cu mester wordo regla, pa stimula e desaroyo di muchanan y nos hendenan pero tambe pa yuda esnan cu no tin otro manera pa por yega nan dje. Mi ta wak hopi mayor bay afo, Hulanda of Merca, pa percura pa nan yiu por haya e tipo di cuido aki, y mi no ta haye fear. Si nos por busca un manera pa brinda esaki, miho nos mantene nos famianan akinan, pa por yega na e tipo di terapia y cuido aki mes, na lugar di bay afo busk’e”, Misha Raymond, Parlamentario di fraccion di RAIZ, a señala.
