Historia di Aruba tin prueba cual partido a trece Mafia --- Ora Mike tabata brasa Paul a lubida cu ta primo di Evelyn --- Un dama a contesta wega politico barata for di su haltura
ORANJESTAD(AAN)- Un dama a papia! Un dama cu a keda na su haltura. Un dama cu merece e respet cu e ta ricibi di Aruba como Prome Ministro di e pais, cu el a sirbi y a scapa for di desastre cu el a hereda.
Esaki tabata nos conclusion na momento cu nos a tuma nota di e contesta di Prome Ministro Evelyn Wever-Croes riba e accionnan baho pa atrobe mishi cu su bon nomber y reputacion.
Manera e mes a trece dilanti, e no a bay tene discurso contra Ministerio Publico pasobra nan ta atende cu un persona cu ta parti di su famia y simplemente a mustra cu su persona no ta responsabel pa acto di ningun hende cu mester mira kico nan ta haci.
Awe DIARIO ta lanta contra e atakenan baho cu ta tuma luga continuamente contra Prome Ministro Evelyn Wever-Croes den intentonan di contrincantenan politico cu kier score pa haya mas voto y asina goberna na Aruba, cu ta bon na haltura kico ta Maffia.
Maffia ta e personanan cu a drenta ora Gobierno di AVP a asumi mando di e pais nobo, Aruba, y mester a bandona e pais na careda pa no benta nan den prison.
Maffia ta nomber cu a resona no mucho tempo despues cu e proyecto hotelero Beta, cu a exigi hasta pa Reino actua y e prome Gobierno di AVP atrobe drenta noticia relaciona cu Maffia na Aruba.
DIARIO tin tur prueba pa pone riba mesa di berguensa cu Aruba a pasa ora e pais a wordo menciona den cuadro di crimen organisa.
Siglo 20 a habri cu nomber di Aruba atrobe na suela ora cuatro ministro di Gabinete Henny Eman mester a aparece dilanti Huez y tres a wordo condena pa Henny Eman mes scapa pasobra no tabata tin cuenta anual.
Na 2014 ora financieramente Aruba a wordo destrui, Mike a bay Cuba y Citgo a trece personanan cu a bolbe pone Aruba den luz negativo na mundo.
Loke a pasa ayera cu Prome Ministro Evelyn Wever-Croes no tin nomber na un comunidad democratico, cu no ta tolera pa tira lodo riba hende pasobra nan ta contrincante politico.
A trata di uza e persecucion y condena di Paul Croes, contra Evelyn Wever-Croes pasobra nan ta primo.
Como dama, Evelyn Wever-Croes cu honor y educacion, a reacciona riba e ofensanan cu a wordo haci contra su persona door di e partido AVP di Mike Eman, cu tabata e persona cu tabata brasa Paul Croes cu ora e tabata stima Paul, a lubida cu Paul ta primo di Evelyn Wever-Croes.
Paul Croes tabata miembro di Gabinete Mike Eman, mescos cu Benny Sevinger cu Mike Eman a planta den Parlamento pa pone cara di Aruba na berguensa.
Awe abuso ta wordo haci contra un dama, cu a contesta lodo politico manera un dama mester haci enfrente contrincantenan politico, cu aparentemente tin problema pa bandona lodo.
Mescos cu Prome Ministro Evelyn Wever-Croes, DIARIO ta laga na autoridad pa haci nan trabou den e caso cu kier a uza pa trata na herida Prome Ministro Evelyn Wever-Croes pasobra no por haya herment politico valido contra su persona.
E reaccion di Prome Ministro Evelyn Wever-Croes a duna prueba cu e ta halto eleva for di e pos di lodo di su contrincantenan politico barata cu a destrui Aruba na tur forma!
