Hefe di ambulance Liberato Hoek:
ORANJESTAD (AAN) – Hefe di Departamento di Ambulance, señor Liberato Hoek, a duna un declaracion na prensa, riba locual a sosode Diadomingo.
Hoek a splica cu na mesun momento nan a haya dos melding pa e servicio cu ta wordo duna. Tabata tin un melding na aeropuerto unda cu dos ambulance mester a asisti, y tambe un accidente cu un herido, na Angochi cu tambe ambulance mester a yuda.
El a splica cu locual a pasa na Baby Beach tabata un evento cu no tabata parti di ambulance su planificacion. Soul Beach, e ultimo tres dianan a pidi servicio di ambulance na Moomba Beach pa e evento cu nan tin durante e dia, entre 10’ or cu 3’or.
Liberato Hoek a splica cu tambe nan a pidi servicio di ambulance entre 11 or di anochi y 3 or di madruga, pero lamentablemente pa esun na Baby Beach no a pidi servicio di ambulance. Na momento cu e situacion a sosode tur ambulance tabata ocupa. E mesun ambulance cu na e momento ey a caba cu e evento na Moomba Beach, e ora ey mester a dirigi su mes na Baby Beach.
El a remarca cu mas ambulance na e momento ey, no tabata tin den servicio. Hoek a subraya cu nan ta ripara cu tin biaha hendenan ta wak diez ambulance para na Wayaca, pero esey no kiermen cu tur diez ta den servicio. Nan capacidad pa cada warda, ta te tres ambulance cu ta locual e structura ta brinda e pueblo di Aruba. Tin biaha enberdad nan por tin te 4, pero esey no ta tur dia. Hoek a subraya cu servicio pa eventonan ta apart y organizadornan tin cu zorg pa esaki.
Hoek a bisa cu locual ta hopi importante ta cu na momento cu pidi ambulance pa un evento, zorg pa tin cuido medico. Ambulance no por para responsable cu e organizadornan no ta percura pa esaki. El a bisa cu e vergunning ta cuminza na momento cu nan ta pidie na KPA.
Den e caso aki KPA tin cu controla si tur cos ta “in place” cu e permiso, pues si tin cuido medico. Liberato a menciona cu den pasado pa cosnan mas chikito tabata un exigencia pa tin cuido medico. Awo, den un evento cu ta conoci cu ta den dia, den solo, cu hendenan ta bay bebe, hendenan di afo cu no ta custumbra cu nos clima, e cosnan aki por sosode.
