Parlamentario Rocco Tjon preocupa:
ORANJESTAD (AAN) Tin otro situacion cu ta tumando lugar na Aruba, cu ta preocupa Parlamentario Rocco Tjon hopi. Esaki ta cu e ta tuma nota cu tin mas y mas caso di suicido den nos Isla. “No tur ora nan ta wordo raporta den prensa y esey tin su motibo. Mi no ta culpa prensa en absoluto, pero cu e mester di mas atencion sigur cu si!”, e parlamentario a señala.
Tjon a agrega cu pa esaki mester di mas fondo, sigur. “Nos a bay laga un presupuesto atras pa fortifica full e veld aki. Pasobra ora bo ta papia di salud mental, e factor cu ta conduci un hende cu tin retonan cu salud mental por ta diferente. Por ta, por ehempel, problemanan financiero, problemanan social, etc. Dus, nos a laga un mocion atras, pasobra tabata tin un ‘ministerraad besluit’ caba pa aumenta e presupuesto pa diferente Fundacion ey, pa Stichting Hunto, Fundacion contra Violencia Relacional, Fundacion Respeta Mi, etc., etc. Tambe a wordo corta door di gobierno. Awor nos ta wak e consecuencianan aki. Si bo no inverti den e sector social, na final di dia e por resulta den problemanan pa e sector salud”, Parlamentario Rocco Tjon a señala.
E ta señala cu p’esey gobierno anterior, en todo caso, a scoge specificamente pa pone e carteranan di Husticia y Asunto Social hunto, envez di laga nan separa.
“Ademas, ora nos a bay diferente conferencia den exterior, e ‘modelo di Aruba’ tabata wordo elogia y diferente pais a adapta esaki tambe. Pasobra ora bo wak literatura, pero tambe diferente programa cu ta cu ta wordo ehecuta pa atende cu e problematica aki rond mundo, nan ta tene hopi cuenta cu e problemanan social. Pasobra problemanan ta conduci cu’n hende ta haya su mes cu retonan pa loke ta trata salud mental”, Parlamentario Rocco Tjon a subraya.
El a finaliza bisando cu fraccion di MEP a haci masha hopi pregunta caba riba e tema aki na Minister Wyatt-Ras, pero nan no ta haya contesta riba tur, principalmente riba e preguntanan mas clave.
