Minister Ursell Arends:
ORANJESTAD (AAN) — Minister Ursell Arends a declara den entrevista cu DIARIO, cu el a introduci un Ley di Bienestar di Animal, y banda di esaki a traha un maneho, cu awor ta cana su caminda pa yega Raad van Advies, djey bay Parlamento.
“Un bez cu e yega Raad van Advies e ta fuera di mi control, mi no sa con largo e lo dura. E ta depende di Raad van Advies y despues mester bin e rapport, e parlamentarionan tin chens pa haci preguntanan cu gobierno mester contesta, prome cu e ley aki bin na vigor”, Minister Arends a subraya.
El a agrega cu idealmente nan kier pa e ley bay na vigor entrante 1 di Januari 2025, pero, el a reitera, e aspecto di control di e fecha aki, lo ta fuera di su control.
No obstante cu tin eleccion dia 6 di December, e mandatario a comenta cu tin palabracionnan haci, y e ta kere cu e ley aki ta na bienestar general, pasobra e ta beneficia full e pais, y si e ta cla y e por wordo trata den Parlamento, e lo haci tur su best p’asina aki Parlamento di Aruba tambe dun’e su sosten.
“Pasobra tin miembronan di Parlamento cu tambe tin e mesun interes aki, pa yega na un solucion y cambia e perspectiva con ta atende cu nos mascotanan”, e dignatario a señala.
PET CREMATORY:
Tin otro desaroyo positivo pa loke ta trata restonan di cadaver di cacho. Tin un compania cu lo habri un “pet crematory” unda nan lo procesa e carcasnan, y di e forma aki por wak un desaroyo positivo cu ta tumando lugar.
“Mi ta spera cu gran mayoria di nos comunidad por afford esaki, pero pa e situacion di Santana di Cacho, mi tin un reunion pendiente cu SNBA, pa hunto nos tackle esaki pa yega na un solucion”, Minister Arends a subraya.
