ORANJESTAD (AAN) – Minister di Husticia, señor Rocco Tjon, contestando preguntanan di prensa, a elabora riba tres asunto:
1: Mehoracion di infrastructura den KIA. 2: Proyecto KIA nobo y 3: Seguridad ora presonan ta haci trabao pafo di KIA.
INFRASTRUCTURA:
E mandatario a menciona cu e suma cu tin disponible pa e proyectonan den KIA tambe ta inclui mehoracion di e infrastructura.
DELIBERANDO CU HULANDA:
Tambe el a referi na e plan pa traha un edificio nobo pa KIA, indicando cu ora di papia di un proyecto asina mester papia di desaroyonan na corto, medio y largo plazo.
Pa loke ta corto plazo e inversionnan cu ta na caminda, nan a necesario, pasobra si bin mes cu un Instituto nobo, mester atende prome cu locual ta sosodiendo aworaki, segun e dignatario, y pesey e inversionnan aki.
Encuanto a inversionnan na largo plazo tabata tin un “Request for Expressions of Interest” cu ya caba a tuma lugar, y companianan internacional y local por a bid riba esaki, pero obviamente esaki ta hopi costoso.
Minister Tjon a indica cu gobierno ta deliberando aworaki cu Hulanda pa wak si nan tambe ta dispuesto pa yuda financia e proyecto aki, mirando cu toch e tema aki ta importante pa Hulanda tambe, y specialmente ora cu no por garantiza derechonan humano, na final di dia ta algo cu ta toca Reino. Y pesey gobierno ta bezig constantemente riba e tema aki, cu Hulanda. E mandatario a señala cu aworaki, manera ta conoci, tin mandatarionan nobo cu a caba di instala den e gobierno di Hulanda, y Aruba lo bay combersa cu nan riba e tema aki.
E mandatario a agrega cu e Colegio di Supervision Financiero tambe a haci gobierno e pregunta con nan ta mira cu nan ta bay financia e proyecto aki, y gobierno a contesta CAft cu nan ta na spera di combersa riba e tema cu e mandatarionan nobo di Hulanda, pa wak con por yega na otro pa e Instituto Coreccional nobo di Aruba, por bira un realidad.
SEGURIDAD ATRAVEZ DI TECNOLOGIA:
E mandatario a wordo puntra tambe encuanto e detenidonan cu no ta peligroso, cu ta wordo poni haci trabaonan pafo di KIA, con ta maneha e parti di seguridad. Minister Tjon a contesta cu obviamente, ora ta scoge pa haci esey, mester tene cuenta cu e aspecto di seguridad y aworaki ta analizando un proyecto nobo cu ta e introduccion di e banchi electronico pa uza na pia di e detenido, pa por duna mas contenido na e seguridad. Esaki ta keda e aspecto di mas importante, y mester garantiza esaki tambe ora di laga detenidonan bay traha den proyectonan pafo di KIA.
E mandatario a conclui bisando cu atravez di tecnologia, esaki lo bira un realidad.
