ORANJESTAD (AAN): Manera ta conoci, scol secundario John Wesley College na San Nicolas, ta un scol cu ta resorta bao di e Stichting Protestants Christelijk Onderwijs Aruba (SPCOA). Esey ta e motibo principal, di con ta SPCOA ta e unico cu por tuma decision riba e scol aki y su futuro.
Recientemente, SPCOA a splica ampliamente den prensa cu nan
a reuni cu diferente miembro di parlamento, entre otro, Mike Eman y algun miembro di fraccion di AVP.
SPCOA a pone esaki den un carta pa splica e motibo cu nan a yega na e decision di cera John Wesley College. Apesar cu Gobierno di Aruba semper a duna y te e dia di awe ainda ta dunando John Wesley College subsidio, nan a splica cu den e ultimo 4 añanan e cantidad di alumno a disminui di 227 pa 64 alumno so.
Pues financieramente e no ta factibel pa SPCOA mantene e scol habri cu cantidad limita di alumno, of lo mester a yega na decision pa aumenta schoolgeld drasticamente.
Manera a splica anteriormente, Gobierno di Aruba no por tuma decision riba un stichting. Ta masha lamentable mes cu Mike Eman ta gara e bandera politico despues di e caso di Avestruz, unda el a worde acusa den caso di corupcion pa defende su amigo y colega Benny Sevinger cu tin un condena di hues riba su nomber.
Por a mira con Mike Eman a bay cende bela y hunga cu emocion di esnan den veld di enseñansa na San Nicolas, purbando di benta e culpa riba Minister di Enseñansa Endy Croes y Gobierno di Aruba.
Mike Eman a uza algun aliado riba lista politico, entre otro, juffrouw di scol Otami Thomasia y cabesante di Colegio Hilario Angela, Señora Cornelia Aventurin Connor pa defende corupcion y manipula informacion cu no ta berdad. Ta masha lamentable cu juffrouw Aventurin ta participa den un acto baho asina y ta pone hende cuestiona su capacidad como cabesante di un scol. Ademas, tin un rapport riba e scol aki y lo trece esaki mas adelante.
Minister di Enseñansa ta expresa cu e ta lamenta cu partido di AVP ta uza esaki pa campaña politico.
Finalmente, e mandatario di Enseñansa ta señala cu e edificio di John Wesley ta keda habri y lo realoca otro scol resorta bou di SPCOA na e edificio aki. Ningun mucha a keda sin scol y ningun docente a keda sin trabao, mirando cu SPCOA a percura pa aloca tur na otro scol.
Pues, ban laga e caso aki den pasado, ban enfoca den futuro di Pais Aruba y garantisa un enseñansa di calidad pa nos mucha- y hobennan.
