Mundo a bira e baile tristo di un para herida dor di un enemigo inespera y invisibel - *Si Aruba perde cantidad di trahador y empresario na Covid-19 kende lo mantene economia? - *Acaso morto of hende na ventilator ta capaz pa bishita of traha na establecimento nocturno?
ORANJESTAD (AAN) — Como empresa comercial DIARIO tambe mester tene su bienestar na bista. Mescos cu tur empresaria DIARIO tambe ta conoci cu e resultado di e atake di Covid-19 cu tin cierto particularidadnan cu mester tene na consideracion prome cu bini dilanti cu exigencia na gobernacion.
Pa comprende e situacion di Aruba y mundo actualmente, nos a para keto na e mensahe intenso di “The Swan Song”. Un clasico di mundo di ballet cu ta presenta e bida di e zwaan, e parha mahestuoso pero tambe e momentonan cu e ta lucha cu bida.
E parha cu ta enfrenta morto awe ta nos mundo, cu a wordo ataca dor di un enemigo inespera y invisibel. Un enemigo cu nos por a enfrenta solamente cu e vacuna, cu a cay for di cielo na 2020 ora nos a desespera.
Pakico awe 85 porciento di Aruba no a vacuna? Pasobra un parti demasiado grandi di e poblacion a opone vacuna, a opone medidanan necesario pa cuida bida, y a exigi pa sigui baila, sigui goza, sigui haci manera nada ta pasa, y asina entrega e pais na un enemigo incontrabel.
Covid-19 ta un enemigo incontrolabel, cu no a permiti ningun Gobierno na mundo planifica su entrada y crecemento destructor. Mundo tabata hustamente spera un mehoracion economico y Aruba a crea e base di su recuperacion, ora Covid-19 a pone mundo na careda.
Si no tabata pa medida pisa cu Gobierno a tuma, awe Miles di Arubiano a muri. Aki nos no ta exagera, pero ta basa nos mes riba e cantidad di hende cu ta muri actualmente na Aruba, cu a controla diferente ola di Covid-19, caminda Gobierno a percura pa cuido necesario mientras den cooperacion cu Reino, Aruba a bira uno di e prome paisnan den nos region pa haya oportunidad pa vacuna.
E maneho cu Gobierno Wever-Croes a hiba, a scapa bida di Miles di hende, cu nos mes no sabi ta kende nan ta.
Ningun hende tin siguransa cu nan lo sobrebibi Covid-19 cu a cambia planificacion mundial, produccion mundial den e baile di un parha, den un baile di morto.
Cu un presion enorme di tur banda, Gobierno Wever-Croes mester a suavisa medidanan cu tabata tin. A pidi tur hende pa cuida. Kico a pasa?
Awe Aruba conoce un saldo hopi tristo di e Coronavirus nobo, cu hende mester confronta efectivamente si hende no kier pa e destrui hende. Aki nos no ta papia di destruccion di companianan. Nos no ta papia di empresa cu ta perde placa y cual nos tur ta conoci pasobra ta Gobierno a tene e cabez di empresanan riba awa bruto ora na 2020 Covid-19 a ataca.
Awe Comercio mester coopera. Cuanto placa mas un empresa por produci den un par di hora? Cuanto hende mas por muri si toque de keda wordo elimina of si cera Aruba mas laat?
Cuanto paranda lo duna morto un chens pa sigui mata Arubiano? Pasobra morto ta e resultado di e enfermedad. Morto di hende cu ta wordo dera pero tambe morto di hende cu ta muri na bida pasobra Covid-19 ta destrui nan calidad di bida.
Morto di hende cu no kier a acepta toque de queda y medida, pero tambe morto di hende inocente cu a wordo mata dor di hende sin piedad cu a plama e malesa mientras por sigui baila y gosa.
Ancianonan, muchanan cu no ta bandona cas anochi ta victima di hende cu despues ta yora nan morto. Pakico yora? Esaki no tabata e deseo?
Un enemigo ta bati Aruba sin piedad. Mundo ta na guera cu Covid-19. Awor kico Gobierno mester haci? Evita cu mas victima di e guera ta cay of habri porta pa torpedonan di Covid-19 destrui comercio, industria, trabou, trahadornan, schoolnan, tur hende?
For di siman pasa, e resultado di Covid-19 a bira The Swan Song. Alma di hende cu tin alma ta estremece. Un morto, cuatro morto, dos morto. Esaki ta e noticia di tur dia.
Awor kico haci? Ban subi caya y tene happy hour pa celebra morto di nos hendenan?
Palabra a caba!
Nos no tin nada mas pa agrega!
