Belgis Montalvo, Director di Stitching HUNTO:
ORANJESTAD (AAN) Stichting Hunto ta bezig cu un ley pa kita adicto for di riba caya, ora nan presenta un peligro pa otro hende, cu ya caba ta na nivel di Ministerio, segun Dalgis Montalvo, director di SH a duna di conoce den entrevista cu DIARIO.
El a señala cu e Ministerio tin tempo ta bezig cu cambionan di ley y ta trahando riba esaki caba. Loke ta pasa ta cu tin diferente factor cu mester wordo implementa, pa esaki bay na vigor.
“Pero na momento cu un persona su bida, of di otro, ta na peliger, ya caba ta ancra den Ley cu por kita e persona un rato for di caya. Aworaki, involuntariamente por bo tin cu tuma un persona, esey tabata tin den pasado, pero actualmente no tin un edificio pa yuda cu esaki. Pero con cu bay bin, bo por yuda e persona den un parti chikito, por stabilic’e, por ta, pero e ayudo mes ta bin na momento cu e persona mes acepta cu e tin un malesa y cu e kier wordo yuda. Enberdad, bo por kita e persona for di caya un rato, pero bo no ta takel e problema mes cu e tin, ainda”, Dalgis Montalvo a relata.
Hunto tin su team cu ta bay riba caya, y un di e proyectonan pendiente pa 2025 ta esun di bus. Nan ta trahando riba esey caba, pero nan mester refuerzo, y fondonan disponible pa por sigui cu e proyecto.
