Decision di Huez durante eleccion a bira investigacion DIARIO
*Tratado internacional ta regla e derecho riba bida priva di hende
*Copia y uza documento personal y habri carta di otro ta castigabel
ORANJESTAD (AAN) — Defensa di e derechonan di tur ciudadano pa asina sostene a felicidad di e Arubiano, tabata motibo cu DIARIO a wordo introduci como e matutino autenticamente Arubiano cu no ta depende ni di placa cu ta bini di exterior.
Pa por cumpli cu e tarea aki, DIARIO mester vigila tur peliger cu ta presenta den comunidad y ta afecta e libertad total di e Arubiano pa persigui su interes y e interes di su pais.
Libertad pa por usa su concenshi den expresion di democracia, ta e base legal di Aruba como pais democratico caminda hende tin e derecho sagrado riba proteccion contra abuso di su informacionnan priva pa silencia su persona y su derechonan.
Durante ultimo eleccion, Hues a entrega comunidad e importancia di lucha pa mantencion di privacidad di tur hende, loke ta nifica cu Hues a confirma cu ley ta defende e hecho cu informacion priva di un persona, no por bira informacion publico.
E investigacionnan cu DIARIO a realisa, ta duna tur indicacion cu tin un tendencia creciente pa trapa riba leynan cu no ta permiti pa informacion personal di un persona cay den man di tur hende pa medio di entre otro su formanan di identificacion personal, su corespondencia incluso post cu otro persona, y tur loke ta haci cu su bida y informacionnan priva por wordo malusa pa stroba su libertad den buskeda di su felicidad a base di ley na Aruba.
Informacionnan cu a alcansa DIARIO ultimo tempo ta mustra cu na un forma alarmante, exigencia pa ricibi un copia di informacion oficial y priva di hende, ta wordo abusa.
E situacion a bira asina serio cu tin ciudadano preocupa pa e forma cu instancianan, negoshi y organisacionnan pidi copia di nan cedula di identidad, loke ta nifica cu nan informacion personal ta wordo abusa na un forma cu ta exigi pa bati alarma y pa instancianan oficial cuminsa splica Pueblo kende y con por exigi nan pa entrega por ehempel nan cedula of pasaporte na otro persona.
A yega asina leu, segun informacionnan cu DIARIO a ricibi den su trabou di investigacion periodistico, cu Arubianonan na hopi instancia ta wordo poni lomba contra muraya pa entrega nan cedula, pasaporte, rijbewijs of otro documento cu tur nan informacion personal pa un copia wordo saca di nan documento cu a wordo produci dor di nan pais como nan identidad como ciudadano.
Informantenan di DIARIO a mustra cu libertad personal di hende ta na peliger, cu e forma cu ta saca copia di e pruebanan di identidad di un persona, cu ta basa riba informacionnan tan secreto cu departamentonan cu ta traha cu e informacionnan aki, no tin permiso pa duna cualkier persona.
“Ta increibel cuanto hende ta traha copia di documentonan personal di hende,” a bini dilanti di informantenan. Hopi hende ta duna prueba di nan sorpresa ora nan wordo confronta cu e Tratado di Privacidad di hende, cu ta exigi respet pa informacion personal di hende, loke ta haci cu ni post di un persona por wordo habri sin peligro pa e persona cu mishi cu e post, haya su mes persigui pa autoridad.
Mester pone punto final na e situacion actual di abuso di informacion di hende, segun informantenan cu a mustra cu DIARIO como matutino di Aruba, tin e deber di expresa e informacionnan importante aki na publico.
E documentonan cu ta confirma identidad di un persona, manera pasaporte of rijbewijs y cedula, por wordo solamente presenta na un forma cu un persona ta mustra cu e tin prueba cu e ta e persona cu e ta. No ta permiti pa saca copia di e documentonan aki, cu ta sagrado legalmente.
E instancianan cu tin e autoridad pa saca un copia di un cedula, un pasaporte, cualkier otro documento priva di un persona, ta instancianan oficial cu ta traha pa Gobierno y cu ley a duna poder pa haci esaki.
Banco, notario, casino, compania di seguro y e dunador di trabou tin e autorisacion pa saca copia di e documento cu ta duna prueba kende e persona ta pero tambe ta mara na secrecia y solamente por usa e documento aki pa sostene e funcionamento di Aruba como pais di ley.
Informacionnan cu DIARIO ta ricibi y cu ta mustra cu mas y mas ta bira costumber pa tur hende exigi un copia di cedula, di pasaporte, rijbewijs entre otro, ta exigi pa instancianan oficial informa Pueblo debidamente di su derechonan y evita cu informacion priva di hende ta bira materia publico y arma di loke ta ilegal.
DIARIO na su turno ta sigui amplia riba e tereno importante aki.
