SANTO DOMINGO: Senado di Republica Dominicana a aproba un proyecto di ley cu ta contene diferente modificacion pa cu e declaracion y registro di babynan recien naci.
E ley aki ta enfoca riba Registro Civil di e pais, y tin hopi regla specialmente riba e ordo di famnan, y tambe e “nombernan permiti” pa bo duna bo yiu.
Encuanto nomber, na Articulo 72 ta poni cu tin “restriccion pa registro di nomber”, den cual ta indica cu e nombernan cu bo ta duna bo baby “no por atenta contra dignidad”.
A pone riba dje, cu e nomber cu bo ta duna e baby recien naci, tampoco no mag di ‘crea confusion’ pa cu e identificacion di sexo di e mucha.
Den e prome paragraf di e Articulo a wordo poni cu si acaso ta surgi conflicto pa cu dunamento di nomber, e ora ta e funcionario di Registro Civil ta esun cu tin e poder pa nenga di registra un nomber.
Den e di dos paragraf, ta poni cu bo no mag di duna un baby recien naci, e mesun nomber di un di su rumannan cu mesun fam, excepto si e ruman a fayece.
Asunto di fam: E ley nobo ta referi na e orden di fam tambe. Na Articulo 84 ta poni cu: “Ta registra como fam di e baby, e prome fam di e Tata y e prome fam di e Mama, den e ordo cu nan ta dicidi den acuerdo comun.” Pero si acaso no ta existi un acuerdo, e ora e funcionario di Registro Civil ta dicidi na resolve esey via di ‘un sorteo’ cu ta bay usa un random-number generator di un machine cu lo wordo suministra pa Hunta Central Electoral.
Si acaso e Tata no kier reconoce e baby, e ora e mucha lo haya e dos famnan di e Mama.
Na final di e Ley, ta poni cu ora e mucha bira mayor di edad, pa un solo biaha e mag di bay pidi pa cambia e orden di su famnan, “cu e meta di fiha su identidad personal”.
Un punto cu ta wordo inclui tambe den e ley, ta pa prohibi matrimonio di personanan menos di 18 aña. Nan no mag di casa bao ningun circunstancia, y e funcionario di Registro Civil tin di percura pa esey no socede. Tambe ley ta prohibi bo di casa cu cualkier relativo of famia directo.
