Centro di Bario Noord
ORANJESTAD (AAN): Siman pasa Diabierna, Centro di Bario Noord a celebra un momento hopi special cu presentacion di e programa Let’s Act Aruba cu a marca e final di e prome periodo 2025-2026. E actividad tabata un ocasion pa exhibi e talento, creatividad y expresion cultural di e comunidad, caminda participantenan a comparti cu publico e resultado di varios luna di sacrificio, enseñansa, dedicacion y entusiasmo.
Durante e presentacion, diferente disciplina artistico a wordo presenta riba escenario, dunando publico un bista di e variedad di talento cu ta biba den nos comunidad. Entre e presentacionnan tabata lesnan di baile folklorico, Cuarta y Fotografia, cada un representando un parti importante di e proceso creativo y cultural cu e programa Let’s Act ta stimula.
Tayer di baile folklorico a keda facilita pa Sr. Erwin Croes, tayer di cuarta a keda facilita pa Sr. Aaron Giel y Tayer di fotografia a keda facilita pa Sr. Ayrton Tromp. Un di e momentonan special di e anochi tabata e presentacion di un preview di e videoclip “Noord, Nos Dushi Bario!” Un proyecto cu ta pone Noord, su comunidad, cultura y talento local den e centro di atencion mustrando e beyesa y identidad di e bario desde un perspectiva creativo. E preview ta duna e publico un prome bista riba e resultado di e trabao cu a wordo haci y ta aumenta e expectativa pa e siguiente fase di e proyecto.
Aunke e prome periodo di Let’s Act ta yega na su final, e programa mes no ta termina aki. E iniciativa ta continua durante e siguiente periodo, 2027-2028, cu e meta pa finalmente presenta e version final di e proyecto.
Pa e programa, cada disciplina a representa no solamente un actividad artistico, sino tambe un oportunidad pa siña, colabora, experimenta y descubri talento. Let’s Act ta continua, y e siguiente periodo lo trece mas oportunidadnan pa desaroya talento, creatividad y expresion cultural. Durante e periodo 2027-2028, e proyecto “Noord, Nos Dushi Bario!” lo yega na su culminacion cu su version final, dunando continuidad na e trabao cu a cuminsa durante e prome
periodo.
Centro di Bario Noord ta gradici Cede Aruba y Bario Unico pa nan apoyo y contribucion na e proyecto Let’s Act Aruba. Danki pa e colaboracion y respaldo, e programa por a duna miembronan di e comunidad un espacio pa explora y desaroya nan talento, mientras cu nan por contribui na preservacion y celebracion di nos cultura.
E presentacion tabata tambe un reconocimento na tur e personanan cu a forma parti di e trayecto: participante, instructorna, artista, colaboradornan, famia y tur hende cu a aporta na e proceso.
Danki na tur hende cu a forma parti di e trayecto y a haci e prome periodo di Let’s Act un experiencia asina special. Let’s Act ta continua - y ainda tin hopi mas talento, creatividad y historia pa comparti.
{gallery}Lets Act a celebra final di e prome periodo cu talento, cultura y creatividad di comunidad{/gallery}
