Otmar Oduber
ORANJESTAD (AAN): Durante siman, ex-Ministro Otmar Oduber kende awor ta forma parti di Plataforma Pais, a reuni cu SVb pa atende diferente topico di interes, entre nan e proposicionnan cu e Plataforma tin pa loke ta mehoramento di Aruba.
Durante reunion di Plataforma Pais cu SVb a atende un di e topiconan cu e Plataforma aki ta enfocando riba dje, esta e parti di legalisacion di e personanan indocumenta riba nos isla.
Otmar Oduber a expresa cu for di SVb e por a sinti cu nan ta comparti e pensamento aki. Ta trata di aproximadamente 10 mil persona cu ta costando Pais Aruba hopi placa. E ta un tema cu posiblemente hopi hende no kier atende cune, pero cu ta forma un parti integral den mehora e situacion di nos isla. Rapportnan ta ilustra cu ta trata di aproximadamente 50 miyon Florin cu Aruba ta perdiendo.
E personanan aki tin un trabao, famia, vivienda, pasobra nan no ta biba bou palo of bou brug, pero nan no ta contribui cu e sistema di entre otro AZV y AOV.
Si logra legalisa e personanan aki den un forma coordina y bou cierto condicionnan, manera entre otro, inburgering, lo genera un aumento den entradanan cu lo por contribui na mehora e fondonan medico y social, como tambe entradanan di gobierno.
