Sentencia di Benny Sevinger cu efecto directo pa Mike y partido
*Patronahe politico ta wordo representa den e neishi di Avestruz?
*Era di Mike Eman ta cera sin sucesor pa cambia imagen AVP
ORANJESTAD (AAN) — “E sentencia di Huez den e caso Avestruz, no ta solamente un condena pa e persona di Benny Sevinver, pero tambe ta condena e sistema di petronahe politico cu ta conduci na corupcion.”
Esaki ta opinion di expertonan cu kende DIARIO for di momento cu e veredicto a bira conoci, a analisa puntonan central den e scandal cu segun expertonan ta marca e inicio di fin di e Era di Mike Eman.
“Na 2009, rondona pa un grupo di cara hoben, Mike Eman a haci su entrada como gobernante. E no tabata su entrada como politico cu e tabata henter su bida,” un informante clave a indica.
Mike Eman a priminti Aruba un futuro nobo, cu nunca el a logra entrega Aruba cu a keda cu un macuto di problema riba tur tereno.
Sinembargo, e sistema di mara votadornan na partido, tabata e arte grandi di Mike Eman, cu a laga un Aruba completamente destrui atras.
Si semper den un partido politico por papia di un persona cu por reemplasa e lider, e gobernacion di Mike Eman a desaroya cu Mike como centro y contenido total di e partido.
Rond di Mike Eman tabata tin satelitenan manera Benny Sevinger, Arthur Dowers, Mike de Meza cu semper a keda den e sombra di e luz di Mike Eman, cu a laga Aruba sin economia, den un desastre financiero y social atras.
E realidad cu Mike nunca a traha riba futuro di e pais a bini dilanti, ora Mike a desaparece despues di eleccion 2017 sin laga un figura central atras como lider suplente di e partido, cu mester a bolbe nombra su persona como lider.
Scandalnan a surgi y e Caso Avestruz a corona e maneho di “family and friends” di gobierno Mike Eman.
Ora mira atras, por nota con partido AVP durante e epoca di Mike Eman, a basa su mes riba “family and friends” loke a wordo confirma cu e caso Avestruz, cu ta un caso cu den cual ta envolve Benny Sevinger, cu tabata Ministro den Gabinete Mike Eman y man drechi di Mike Eman, y awor ta condena pa soberno, placa bou mesa.
Den Partijraad di AVP awor ta bini sosten pa Benny Sevinger, cu segun miembronan di AVP di Mike Eman, mester keda Miembro di Parlamento.
Esaki ta crea otro confrontacion di Mike Eman cu Huez, ya cu Mike Eman ta opone e decision di Huez y ta kibra e regla cu e sentencia di Huez mester wordo respeta, pa defende Benny Sevinger.
Segun e grupo di Mike Eman ta mustra, cu Partijraad den su mayoria a dicidi cu Benny Sevinger no por bandona Parlamento y (contra veredicto di Huez) mester keda Miembro di Parlamento.
Informantenan a indica na DIARIO cu mester bay na e fondo y puntra ta keda ta Miembro di Partijraad di AVP.
E contesta ta cu ta trata aki di activistanan, simpatisantenan, e grupo mas cerca y fiel na e partido.
Mester tene cuenta cu den e grupo di Partijraad tin un grupo di siguidornan total di Eman.
Miembronan di Partijraad a bay di acuerdo den pasado cu gobernacion di Benny Sevinger y di Mike Eman y a sostene e sistema di patronahe cu a bira formula di Mike Eman y ta presente den e caso Avestruz.
E pregunta grandi cu den mundo politico ta bini dilanti ta, si den seno di Partijraad nunca Benny Sevinger por a papia di personanan yega na AVP cu kier tereno.
Segun informantenan ta normal cu den e nucleo di un partido, e topiconan aki ta bini dilanti
Den Partijraad tur desaroyo ta wordo discuti y sigur loke ta deseo di votadornan entre otro.
Tin mas persona, cu no ta solamente Benny Sevinger directamente mara na AVP y hasta Partijraad cu tambe ta bini dilanti den Caso Avestruz, cu a tuma lugar den e seno di AVP, cu ta nenga di condena e scandal y ta bay contra Huez pa defende Benny Sevinger?
DIARIO ta sigui traha riba e caso, cu a bira otro mancha grandi pa politica na Aruba, y cu segun informantenan clave por bira fin di e Era di Mike Eman.
